ހުޅުމާލޭ ބަނދަރަށް ވަންނަ ދިމާއިން، ދެ ލޯންޗު ޖެހި، ނުރައްކާތެރި އެކްސިޑެންޓެއް ހިނގައިފިއެވެ. 

އެމްއެންޑީއެފްއިން ބުނީ، ހުޅުމާލޭ ބަނދަރަށް ވަންނަ ދިމާ ބޭރުން ދެ ލޯންޗު ޖެހި އެކްސިޑެންޓް ވެފައިވާ ކަމުގެ ރިޕޯޓް މިރޭ 08:09 ހާއިރު މެރިޓައިމް ރެސްކިޔު ކޯޑިނޭޝަން ސެންޓަރ، އެމްއާރްސީސީ އަށް ލިބިފައިވާ ކަމަށެވެ. 

އަދި ރިޕޯޓް ލިބުމާއި އެކު ކޯސްޓް ގާޑާއި މެރިން ފުލުހުން އެ ސަރަހައްދުގައި ހަރަކާތްތެރިވާން ފެށި ކަމަށްވެސް ބުނެފައިވެއެވެ. 

މިއާއެކު އެމްއެންޑީއެފްއިން ބުނީ، އެތަނުން އެއް ލޯންޗު ދަތުރު ކުރަމުންދިޔައީ ޖޯއީ އައިލެންޑް އިން އެއާޕޯޓަށް ކަމަށާ، އެ ލޯންޗުގައި 13 ފަތުރުވެރިންނާއި، 3 ފަޅުވެރިން ތިބި ކަމަށެވެ. އަދި ލޯންޗަށް ތިބި މީހުންނަށް ލިބުފައިވަނީ ކުދިކުދި އަނިޔާ ކަމަށާ، ލޯންޗުގައި އެ އެންމެން މިހާރު އެއާޕޯޓަށް ގެންދެވިފައިވާ ކަމަށެވެ. 

އެކްސިޑެންޓްގައި ދެން ހިމެނޭ ލޯންޗަކީ ލިއޯ ޓްރޭޑިންގ ގެ ލޯންޗެއް ކަމަށާ، އެ ލޯންޗުގައި ތިބީ ލިއޯ ޓްރޭޑިންގ ގެ 8 މުވައްޒަފުންނާއި 2 ފަޅުވެރިން ކަމަށް ވެސް އެމްއެންޑީއެފްއިން މައުލޫމާތު ދެއެވެ. 

މިއާއެކު އެމްއެންޑީއެފްއިން ބުނީ، އެ ލޯންޗުން ދަތުރުކުރި 5 މީހުންނަށް ވަރަށް ސީރިއަސް އަނިޔާތައް ވެފައިވާ ކަމަށާ އެ އެންމެންނަށް ހުޅުމާލޭ ހޮސްޕިޓަލުގެ އީއާރުގައި ފަރުވާ ދެމުން އަންނަ ކަމަށެވެ. އަދި އެ 5 މީހުންގެ ތެރެއިން ލޯންޗު ކެޕްޓަން ގެ ހާލު ވަރަށް ކްރިޓިކަލް ކަމަށް މައުލޫމާތު ދީފައިވެއެވެ. 

މީގެ އިތުރުން އެމްއެންޑީއެފްއިން ބުނީ ދެ ލޯންޗުން ދަތުރު ކުރި އެއްވެސް މީހަކު ގެއްލިފައި ނުވާކަމަށް ކަށަވަރު ކުރެވިފައިވާ ކަމަށެވެ.