Advertisement
ލޯފަން މީހުންނަށް އެހީތެރިއަކާ ނުލާ ވޯޓުލެވުން: "މިއީ އަޅުގަނޑުމެންގެ ބޮޑު ގުރުބާނީއެއްގެ ނަތީޖާ!"
ލޯފަން މީހުންނަށް އެހެން މީހެއްގެ އެހީތެރިކަމާއި ނުލާ ވޯޓު ލެވޭ ފުރަތަަމަ މި އިންތިޚާބު ގައި، އެ ފުރުސަތު ލިބިގެންދިޔައީ އެފަރާތްތަކުގެ ބޮޑު ގުރުބާނީއެއްގެ ސަބަބުން ކަމަށް، ލޯފަން މީހުންގެ ހައްގުގައި މަސައްކަތް ކުރާ ޖަމިއްޔާ، ބީވީއައިއެސްއެމްގެ ނާއިބު ރައީސް ހުސައިން ޝަރީފު ވިދާޅުވެއްޖެއެވެ.
އެހީތެރިޔަކާއި ނުލާ ލޯފަން މީހުންނަށް ސިއްރު ވޯޓުލުމުގެ ހައްގުލިބިގަތުމަށްޓަކައި ބްލައިންޑް އެންޑް ވިޝުއަލީ އިމްޕެއާޑް ސޮސައިޓީ އޮފް މޯލްޑިވްސް (ބީވީއައިއެސްއެމް) އިން ވަނީ ވަރަށް ގިނަ ގުނަ މަސައްކަތް ތަކެއް ކުރައްވާފައެވެ.
އެގޮތުން، ސެޕްޓެމްބަރު މަހު ބޭއްވޭ ރިޔާސީ އިންތިޙާބުގައި މިނިވަންކަމާއިއެކު ވޯޓުލެވޭނެ ގޮތެއް ހޯދުމަށްޓަކައި ދުނިޔޭގެ އެކި ކަންކޮޅުތަކުގައ މިކަން ކުރެވެމުން އަންނަ ގޮތް އެފަރާތްތަކުން ދިރާސާކޮށްފައިވާއިރު، ރަށްރަށުގައި ތިބި އެ ޖަމިއްޔާގެ މެންބަރުން މާލެ އައިސް، މާލޭގައި ދިރިއުޅޭ މެންބަރުން އެކީގައި، އިލެކްޝަން ކޮމިޝަނާ، ހިއުމަން ރައިޓްސް ކޮމިޝަނާ އަދި ސިޔާސީ ޕާޓީތަކާއި އެކު ވަނީ ގިނަ މަޝްވަރާތަކެއް ބާއްވާފައެވެ.
އަދި ހަމަ އެހެންމެ، ނޫސްވެރިންނާއި ގުޅިގެން، އެފަރާތްތަކުގެ ކަންބޮޑުވުން ދިވެހި އެންމެހާ ރައްޔިތުންނަށް އިއްވާފައިވާއިރު، އެކަން ހައްލު ކުރާނެ ގޮތުގެ ތަފްސީލް ވެސް އެބޭފުޅުން ވަނީ ދެއްވާފައެވެ.
ބްލައިންޑް އެސޯސިއޭޝަންގެ އެ އިރުޝާދު ދެއްވި ގޮތަށް މަޖިލީހަށް ބިލެއް ހުށަހެޅި، އެ ބޭފުޅުން ބޭނުންވިފަދަ ގޮތަށް އެކަން ވަނީ މަޖިލީހުން ފާސްކޮށްފައެވެ. އަދި ރައީސުލްޖުމްހޫރިއްޔާ ވަނީ ބިލު ތަސްދީގު ކުރައްވާފައެވެ.
އެއާއެކު މިއަދު އެފަދަ ފަރާތްތަކަށް އަމިއްލަ އަށް ވޯޓު ކަރުދާހުގައި ފާހަގަޖެހުމުގެ ފުރުސަތު ލިބިގެން ގޮސްފައިވާއިރު، އެކަމާއި ގުޅިގެން "ވޮއިސް" އަށް މައުލޫމާތު ދެއްވަމުން، ހުސައިން ޝަރީފް ވިދާޅުވީ އެފަދައިން ވޯޓު ލުމަކީ ވަރަށް ގިނަ ދުވަސްވަންދެން ދެކެމުންއައި ހުވަފެނެއް ކަމަށާ، އެއީ ވަރަށް ގިނަ ދުވަސްވީ މަސައްކަތެއް ކަމަށެވެ.
މިކަމަށް ވަރަށް ގިނަ ދުވަސްވީ ބުރަ މަސައްކަތް ތަކެއް ކުރެވުނު. މާތް الله ގެ ރަހުމަތުން މިއަދު އަޅުގަނޑުމެންނަށް މިއަދު މިވަނީ އެކަން ކާމިޔާބު ވެފައި. ވަރަށް ގިނަ ބައެއްގެ އެހީތެރިކަމާއި، ވަރަށް ގިނަ ބައެއްގެ ބުރަ މަސައްކަތުން. ޚާއްސަ ގޮތެއްގައި އަޅުގަނޑު ފާހަގަކޮށްލަން މިކަން ތަހަންމަލް ކުރާ، ފެނުމުގެ ނުކުޅެދުންތެރިކަން ހުންނަ ފަރާތްތަކުން ކުރި ބުރަ މަސައްކަތާއި، ވީ ގުރުބާނީ ތަކެއްގެ ނަތީޖާ އިރާދަކުރެއްވިޔާ މިއަދު މިއޮތީ ކާމިޔާބު ވެފައި.
ބްލައިންޑް އެސޯސިއޭޝަންގެ ނައިބުރައީސް ހުސައިން ޝަރީފް
މިއާއެކު ޝަރީފް ވަނީ، މިއަހަރު މިފަދައިން ވޯޓު ލެވޭތޯ، ވަރަށް ގިނަ ފަރާތްތަކާއި ބައްދަލު ކޮށް އެބޭފުޅުންގެ އަޑު އިއްވުމަށް މަސައްކަތް ކުރައްވާފައިވާ ކަމަށެވެ. އަދި އެކަމުގައި އެހީތެރިވެދިން ހުރިހާ ފަރާތްތަކަށްވެސް އޭނާ ވަނީ ޝުކުރު އަދާކުރައްވާފައެވެ.
މީގެ އިތުރުން ޝަރީފު ވިދާޅުވީ އިންތިހާބުގެ ވޯޓުލުމަށް ގެނެވުނު ބަދަލަކީ ވަރަށް ކުރިއެރުމެއް ކަމަށާ، އެދެނީ ކުރިއަށް ހުރި އެހެން އިންތިހާބު ތަކުގައިވެސް އެފަރާތްތަކަށް އެހީތެރިއަކާ ނުލާ ވޯޓުލުމުގެ ފުރުސަތު ލިބުން ކަމަށެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
