ރިޔާސީ އިންތިހާބުގެ ފުރަތަމަ ބުރުގައި އިދިކޮޅު ކޯލިޝަނަށް ލިބުނު ކާމިޔާބީ ފާހަގަކުރުމަށާއި ދެވަނަ ބުރުގެ ކެމްޕެއިން ފެށުމުގެ ގޮތުން އެ ކޯލިޝަނުން މިރޭ އާޓިފިޝަލް ބީޗުގައި ކުރިއަށް ގެންދާ "ޝުކުރިއްޔާ ދިވެހިން" ޖަލްސާއަށް މުޅި ހެންވޭރު ކޮޅު ފުރާލައިފިއެވެ.

އިދިކޮޅު ކޯލިޝަނަށް ތާއީދު ކުރާ ގިނަ އަދަދެއްގެ ސަޕޯޓަރުންނާއެކު ކުރިއަށްދާ މި ޖަލްސާގައި އެ ކޯލިޝަންގެ ރިޔާސީ ކެންޑިޑޭޓް އަދި ކޯލިޝަން ބައެއް އިސްވެރިން ވާހަކަ ދެއްވުމަށް ވަނީ ހަމަޖެހިފައެވެ. 

ރިޔާސީ އިންތިހާބުގެ ފުރަތަމަ ބުރުގައި ތަފާތު ބޮޑު ނަތީޖާއަކުން ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ކުރި ހޯދުމާ އެކު އުތުރު ގިނަ ބަޔަކު ދަނީ މުއިއްޒަށް ތާއީދުކުރާކަން ހާމަކުރަމުންނެވެ. 

Advertisement

އިއްޔެ ބޭއްވުނު ރިޔާސީ އިންތިހާބުގެ ފުރަތަމަ ބުރުގެ ވޯޓުގައި ވެރިކަން ކުރާ މައި ޕާޓީ އެމްޑީޕީއަށް އިދިކޮޅު ޕީޕީއެމް ޕީއެންސީއާއި ވާދަކޮށް ލިބިފައިވަނީ އެ ޕާޓީން އަންދާސާ ކުރި ވަރަށްވުރެ ބޮޑުތަނުން ދަށް ނަތީޖާއެކެވެ. 
އެގޮތުން އެ ޕާޓީން ބުނަމުން އައީ މި އަހަރުގެ ރިޔާސީ އިންތިހާބު ކާމިޔާބު ކުރާނީ އެއްބުރުން ކަމަށާއި އިންތިހާބުގައި 56 އިންސައްތައަށްވުރެ އެންމެ ވޯޓެއްވެސް މަދު ނުވާނެ ކަމުގައި ފައްޔާޒު އަމިއްލަފުޅަށް ވެސް ވަނީ އެތަށް ޕޯޑިއަމެއްގައި ވިދާޅުވެފައެވެ.