ވެރިކަން ކުރާ މައި ޕާޓީ، އެމްޑީޕީގެ މެންބަރުންގެ އެދިލެއްވުމަށް ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެން ގޮސް މަޖިލިސް މެދުކަނޑާލައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގެ އެޖެންޑާގައި ހިމެނިފައި އޮތީ ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ކުރިއަށްގެންދާނެ ގޮތަކާއިމެދު ގޮތެއް ނިންމުމެވެ.

މި ޖަލްސާ ފައްޓަވަމުން ރިޔާސަތުގައި އިންނަވައި ރައީސް ނަޝީދު ވިދާޅުވީ، މިއަދަށް އެ މައްސަލަ އެޖެންޑާ ކޮށްފައިވަނިކޮށް، އެ މައްސަލައިގައި ސޮއި ކުރެއްވި މެންބަރުންގެ ތެރެއިން 25 ބޭފުޅަކު ނަން އަނބުރާ ގެންދަވާފައިވާކަމަށެވެ.

އެހެންކަމުން ނަޝީދު ވަނީ އެ މައްސަލަ ކުރިއަށް ގެންދިއުމަށްޓަކައި ވިލުފުށީ ދާއިރާގެ މެންބަރު ޙަސަން އަފީފާ ރިޔާސަތު ޙަވާލު ކުރައްވާފައެވެ.

އަފީފު ރިޔާސަތަށް ވަޑައިގެންނެވުމުން، މައްސަލަ އާއި ގުޅޭގޮތުން މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވާހަކަ ދައްކަވަމުން ވިދާޅުވީ އެމްޑީޕީގެ ޕީޖީ ގްރޫޕުން އެ މައްސަލަ އަނބުރާ ގެންދިއުމަށް ފާސްކޮށްފައިވާކަމަށެވެ.

ޝަރީފް މިހެން ވިދާޅުވުމުންވެސް އަފީފު ވަނީ އެ ވިދާޅުވާ އަދަދަށް މެންބަރުން ސޮއި ނުގެންދަވާ ކަމަށާ، އެހެންކަމުން އެ މައްސަލަ ކުރިއަށް ގެންދަވާނެ ކަަމަށެވެ. 

މިއާއެކު ނިޒާމީ ނުކުތާ ނަންގަވައި ކުޑަހުވަދޫ ދާއިރާގެ މެންބަރު އާމިރު ވަނީ އާންމުކޮށް މިފަދަ މައްސަލަތަކުގައި މަޖިލީހުން އަމަލުކުރާ ގޮތާއި ޚިލާފަށް ހޯމަ ދުވަހުގެ ޖަލްސާގެ ކަންކަން ކުރިއަށްދާތީ އެކަމުގެ ކަންބޮޑުވުން ފާޅުކުރައްވާފައެވެ.

އެއަށްފަހު މަވޯޓާ ޝަރީފު ވަނީ، އިދާރީ ގޮތުން ކުރަންޖެހޭ ކަންކަން ކޮށް، މަދުވާ ސޮއިތައް ހަމަ ކުރެއްވުމަށް އެ ޕާޓީއަށް އިތުރު ވަގުތު ދެއްވުމަށް މަޖިލިސް މެދުކަނޑާލުމަށް އެދިލައްވާފައެވެ. 

އެހެން ރިޔާސަތުން ވަނީ މަޖިލިސް ކުޑަ ވަގުތުކޮޅަކަށް މެދުކަނޑާލާފައެވެ.