ކުރިއަށް އޮތް ތަނުގައި ވެރިކަންކުރާ މައި ޕާޓީ، އެމްޑީޕީގެ މެމްބަރުންތަކެއް ޕީޕީއެމްއަށް ބަދަލުވުން އެކަށީގެންވާކަމަށް އެ ޕާޓީގެ ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ކޮމިޓީތައް އެކުލަވާލުމާއިމެދު ވާހަކަދައްކަވަމުން ރައީސް ނަޝީދު ވިދާޅުވީ، މަޖިލިހުގައި މެންބަރުން އެކުލެވިގެންވާ ގޮތް ކުއްލި ކުއްލިއަކަށް ވަރަށް އަވަސް އަވަހަށް ބަދަލުވަމުން އަންނަ ކަމަށާއި ނަމަވެސް މިހާރު މި އޮތް ހާލަތުގައި ކޮމިޓީތައް އެކުލަވާލަން ޖެހޭ ކަމަށެވެ.
އަދި އެއަށްފަހު ބަދަލު ގެންނަމުން ދިއުމަށްވެސް ގަސްތުކުރައްވާކަމަށާއި ގިނަ އަދަދެއްގެ ބަދަލުތައް އަވަސް އަވަހަށް އަންނަމުންދާނެ ކަމަށް ބެލެވޭ ކަމަށް އެމަނިކުފާނު ވިދާޅުވިއެވެ.
އެގޮތުން އެމްޑީޕީގެ އެތައް މެމްބަރުންނެއް ކުރިއަށް އޮތް ދުވަސްތަކުގެ ތެރޭގައި ޕީޕީއެމްއަށް ބަދަލުވުމަކީވެސް ވަރަށް އެކަށީގެންވާ ކަމެއްކަމަށް އެމަނިކުފާނު ވިދާޅުވި އެވެ.
"ކުރިއަށް އޮތް ތަނުގައި އެމްޑީޕީގެ އެތައް މެންބަރުންނެއް ޕީޕީއެމަށް ބަދަލުވުމަކީ ވެސް އެންމެ އެކަށިގެންވާ ކަމެއްކަން އަޅުގަނޑަށް ވެސް ފާހަގަވޭ. އެހެން ނަމަވެސް ކޮމިޓީތައް ހިންގުން އަޅުގަނޑަށް ފެންނަ ގޮތުގައި ބޭނުން ތެރި.". ރައީސް ނަޝީދު ވިދާޅުވިއެވެ.
އެމްޑީޕީން ވަކިވެ ޕީޕީއެމް/ޕީއެންސީއަށް ތާއިދުކުރާކަން މިހާތަނަށް ހާމަކޮށްފައި ވަނީ ފޮނަދޫ ދާއިރާގެ މެމްބަރު މޫސާ ސިރާޖެވެ. އެމްޑީޕީން ވަކިވި އެހެން ހުރިހާ މެމްބަރުން ގުޅިވަޑައިގަތީ ޑިމޮކްރެޓްސްއާއެވެ.
Advertisement
This content is created and paid for by advertisers and does not involve Voice Journalists
