ވިސާއާ ނުލާ ދިވެހީންނަށް ގަޔާނާ އަށް ދަތުރުކުރެވޭ ގޮތަށް ރާއްޖެއާއި ގަޔާނާ އިން އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފޮރިން މިނިސްޓްރީގެ ސްޓޭޓް މިނިސްޓަރު އަހުމަދު ޚަލީލެވެ. އަދި ގަޔާނާގެ ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ މިނިސްޓަރ އޮފް ފޮރިން އެފެއާޒް އެންޑް އިންޓަނޭޝަނަލް ކޯޕަރޭޝަން ހޫ ހިލްޓަން ޓޮޑްއެވެ.
ފޮރިން މިނިސްޓްރީން ބުނެފައިވާ ގޮތުގައި މި އެއްބަސްވުމުގެ ދަށުން، ދިވެހިންނަށް ވިސާއާ ނުލައި ގަޔާނާއަށް ދަތުރުކޮށް، އެ ޤައުމަށް އެތެރެވާ ދުވަހުން ފެށިގެން ގިނަވެގެން 30 ދުވަހުގެ މުއްދަތަކަށް އެ ޤައުމުގައި ތިބެވޭނެއެވެ. އަދި ހަމަ އެފަދައިން ގަޔާނާގެ ރައްޔިތުނަށްވެސް ވިސާނެގުމެއްނެތި 30 ދުވަހުގެ މުއްދަތަކަށް ދިވެހިރާއްޖެއަށް ދަތުރުކުރެވޭނެއެވެ.
އެހެންނަމަވެސް ދިގު މުއްދަތަކަށް، ކިޔަވަން ނުވަތަ ވަޒީފާ އަދާކުރުން ފަދަ ކަމަކަށް ގޮސް ހުންނަ ނަމަ ވިސާ ބޭނުންވާނެ ކަމަށް ފޮރިން މިނިސްޓްރީން ބުނެއެވެ.
އެއްބަސްވުމުގައި ސޮއި ކުރުމުގެ ރަސްމިއްޔާތަށްފަހު ޚަލީލު ވަނީ ގަޔާނާ ސަރުކާރުން ދިވެހި ރާއްޖޭގެ ސަރުކާރާއެކު ބާއްވަމުންދާ ގާތް ގުޅުމަށް ޝުކުރު އަދާކުރައްވާފައެވެ. އަދި އެ އެއްބަސްވުމާއި އެކު އެ ގުޅުން އިތުރަށް ބަދަހިވެ، ދެ ގައުމުގެ ރައްޔިތުންނަށް ވެސް އެކަކު އަނެކަކާއި ބައްދަލުވެ ގުޅުން ބަދަހި ކުރުމުގެ ފުރުސަތު ލިބިގެންދާނެ ކަމަށް އުއްމީދު ކުރައްވާ ކަމަށް ޚަލީލު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
