ދިވެހި ސިފައިންގެ ވާޖިބަކީ ދިވެހި ދައުލަތުގެ ސިޔާދަތާއި މިނިވަންކަމުގެ ދިފާޢުގައި ދެމިތިބުން ކަމަށާއި، ސަރުކާރަށް ސިޔާސީ ކެމްޕެއިން ކޮށްދިނުން ނޫން ކަމަށް ކުރީގެ އުއްތަމަ ފަނޑިޔާރު ޑރ އަޙްމައެ ޢަބްދުالله ދީދީ ވިދާޅުވެއްޖެއެވެ.

ކުރީގެ އުއްތަމަ ފަނޑިޔާރު ޑރ އަޙްމަދު މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

ޑރ އަޙްމަދު ވިދާޅުވީ ދިވެހި ސަރުކާރާއި އިންޑިޔާ ސަރުކާރާ ދެމެދު ޤާނޫއަސާސީއާ ޚިލާފަށް ވެފައިވާކަމަށް ބެލެވޭ ސިއްރު އެއްބަސްވުންތަކެއްގެ ދަށުން އިންޑިއާގެ ޢަސްކަރިއްޔާއަށް ނިސްބަތްވާ ސިފައިންތަކެއް ރާއްޖޭގައި މަރްކަޒުކޮށްގެން ތިބޭ ތިބުމަކީ ރާއްޖޭގެ މިނިވަންކަމާއި އިސްތިޤުލާލަށް އޮތް ނުރައްކަލެއްކަމަށް އިދިކޮޅުން ބުނަމުން ދާއިރު، ސަރުކާރުން އެތުހުމަތުތަކުން ދިފާޢުވުމުގެ ބަދަލުގައި، ސިފައިންގެ މަތީފަންތީގެ އޮފިސަރުންތަކެއް ލައްވައި ސަރުކާރުން މިހާރަކަށް އައިސް ނެރެމުންދާ ބަޔާންތަކަކީ އެ މުއައްސަސާގެ ސުލޫކީ މިންގަނޑުތަކާ ޚިލާފަށް ނެރޭ ބަޔާންތަކެއް ކަމަށެވެ.

Advertisement

"ސިފައިންގެ ވާޖިބަކަށް ވާންވާނީ އިސްލާމްދީނާއި ދިވެހި ދައުލަތުގެ ސިޔާދަތާއި މިނިވަންކަމުގެ، އަދި ދިވެހި ރައްޔިތުންގެ ދިފާޢުގައި ދެމިތިބުން، އެބައިމީހުންނަކީ ސަރުކާރަށް ސިޔާސީ ކެމްޕެއިން ކޮށްދޭ ބަޔަކަށް ވެގެންނުވާނެ" ޑރ އަޙްމަދު ވިދާޅުވެފައިވެއެވެ.

މީގެ އިތުރުން ޑރ އަޙްމަދު ވިދާޅުވީ ރިޔާސީ އިންތިޚާބުގެ ދެވަނަ ބުރަށް ހަފުތާޔަކަށް ވެފައި ވަނިކޮށް ސިފައިންގެ ބައެއް ޖެނެރަލުން ސަރުކާރުގެ ދިފާޢުގައި ޢަސްކަރީ ނުވަތަ މިލިޓަރީ ރޯލެއް އަދާކުރާ ބޭރުގެ ސިފައިންތަކެއް ރާއްޖޭގައި ނެތްކަމަށް ބުނަމުން ދާ ކަމަށެވެ.

ދިވެހި ރައްޔިތުންނަށް މިވަގުތަކަށް އެނގެން ބޭނުންވާ މިންވަރަކީ ސިއްރު އެއްބަސްވުންތަކެއްގެ ދަށުން އިންޑިއާ ސިފައިން ރާއްޖޭގެ ބައެއް ހިސާބުތަކުގައި މަރްކަޒުކޮށްގެން ތިބިކަން ކަމަށާއި، ރާއްޖޭގެ ޤާނޫނީ ނިޒާމު އެމީހުންގެ މައްޗަށް ނުހިނގާނޭ ފަދަޔަކުން “އިމިޔުނިޓީ” އެމީހުންނަށް ސަރުކާރުން ޢައިރުޤާނޫނީ ގޮތަކަށް ދީފައިވާކަން ކަމަށްވެސް ކުރީގެ އުއްތަމަ ފަނޑިޔާރު ވިދާޅުވިއެވެ.

އެކަމަށް އިންކާރު ކުރާނެ އެއްވެސް ފަރާތެއް ނެތްއިރު، އެ މީހުން އަދާކުރާ ޢަސްކަރީ ރޯލަކީ ކޮބައިކަން އެނގުމަކީ އެހައި މުހިންމު ކަމެއް ނޫން ކަމަށް ވެސް އޭނާ ވިދާޅުވިއެވެ.

ސިފައިން އަދާކުރާ ޢާންމު ޢަސްކަރީ ރޯލްތަކުގެ ތެރޭގައި “ކޮމްބެޓް އޮޕެރޭޝަންސް” ، “ލީޑަރޝިޕް އެންޑް ކޮމާންޑް”، “ލޮޖިސްޓިކްސް އެންޑް ސަޕޯރޓްސް”، “އިންޖިނިއަރިންގ އެންޑް ޓެކްނިކަލް ރޯލްސް”، “މެޑިކަލް އެންޑް ހެލްތް ކެއަރ”، “ސްޕެޝަލް އޮޕަރޭޝަންސް”، “ޓްރެއިނިންގ އެންޑް އެޑިޔުކޭޝަން”، އަދި “މިލިޓަރީ އިންޓެލިޖެންސް” ފަދަ އެތައް ޢަސްކަރީ ރޯލްތަކެއް ހިމެނިގެންވާ ކަމަށް ޑރ އަޙްމަދު ވިދާޅުވިއެވެ.

" ރާއްޖޭގައި ތިބި އިންޑިއާ ސިފައިން އަދާކުރާ ރޯލަކީ “މިލިޓަރީ އިންޓެލިޖެންސް” އާ ގުޅުންހުރި ރޯލެއްކަމުގައި ވާނަމަ އެކަންދެނެގަތުމުގެ ކެޕަސިޓީ ދިވެހި ޢަސްކަރިއްޔާއަށް ލިބިގެންވޭތޯ ސުވާލުކޮށްލުމަކީ މުހިންމު ކަމެއް ކަމުގައި ދެކެން" ކުރީގެ އުއްތަމަ ފަނޑިޔާރު ވިދާޅުވެފައިވެއެވެ.