ކެނެޑާއަކީ ޓެރަރިސްޓުން ނަށް ރައްކާތެރި ގެއަކަށް ވެފައިވާ ކަމަށް ސްރީލަންކާގެ ދާޚިލީ ވަޒީރު ޢަލީ ޞަބްރީ ވިދާޅުވެއްޖެއެވެ.

ސްރީލަންކާގެ ދާޚިލީ ވަޒީރު މިހެން ވިދާޅުވީ އިންޑިޔާ އާއި ކެނެޑާއާއި ދެމެދު ޖެހިފައި އޮތް މައްސަލައާއި ގުޅިގެން އިންޑިޔާގެ މީޑީއާއެއް ކަމަށްވާ އޭއެންއައި އަށް ދިން އިންޓަރވިއުއެއްގައެވެ.

ކެނެޑާގެ ބޮޑުވަޒީރު ޖަސްޓިން ޓްރޫޑޯ  ވަނީ އެޤައުމުގެ ޤާނޫނު ހަދާ  މަޖިލީހުގައި ވާހަކަދައްކަވަމުން ވަނީ ކެނެޑާގެ ރައްޔިތެއް ކަމަށްވާ ހަރްދީޕް ސިންހް ނިއްޖާރްގެ ގަޔަށް ބަޑި ޖަހައި މަރާލުމުގައި އިންޑިޔާގެ ސަރުކާރުގެ އަތެއް ވާ ކަމަށް ވިދާޅުވެފައެވެ.

މިކަމާއި ގުޅިގެން އިންޑިޔާއާއި ކެނެޑާއާއި ދެމެދު މިވަގުތު ވަނީ ސިޔާސީ ހޫނު މައްސަލަތަކެއް އުދެދިފައެވެ. 

މިކަމާއި ގުޅިގެން ސްރީލަންކާގެ ޚާރިޖީ މިނިސްޓަރު ވަނީ ކެނެޑާގެ ބޮޑުވަޒީރު އިންޑިޔާގެ ސަރުކާރާއި މެދު ކޮށްފައިވާ ތުހުމަތު ތަކަކީ އެއްވެސް ހެއްކެއްގެ ނެތި ދައްކާފައިވާ ވާހަކަތަކެއް ކަމަށް ވިދާޅުވެ ވަރަށް ބޮޑަށް ފާޑުވިދާޅުވެފައެވެ.

"ބައެއް ޓެރަރިސްޓުންނަށް ވަނީ ކެނެޑާއިން ރައްކާތެރި ގެއެއް ކަމަށް ވެފައި، އެއްވެސް ހެއްކެއްނެތި މިފަދަ ދޮގު ވާހަކަތައް ދެއްކުމަކީ ކެނެޑާގެ ބޮޑު ވަޒީރުގެ އާދައެއް، ހަމަ މިފަދައިން ސްރީލަންކާ އާއި މެދުވެސް ވާހަކަތަކެއް ދެއްކެވި، ލަންކާގައި ގިނަ ބަޔަކު މަރާލިކަމުގެ ތުހުމަތުތަކެއް ކުރި، އެވާހަކަތައްވެސް ދެއްކެވީ އެއްވެސް ހެއްކެއް ނެތި،" ޢަލީ ޞަބްރީ ވިދާޅުވިއެވެ.

އިންޑިޔާ އާއި ކެނެޑާއާއި ދެމެދު މައްސަލަތަކެއް ޖެހި އެމައްސަލަތައް ހޫނުވެފައި މިވަނީ ޓްރޫޑޯ، ނިއްޖާރުގެ މަރާއި އިންޑިޔާ އާއި ގުޅުވައި ދެއްކެވި ވާހަކަ ފުޅާއި ގުޅިގެނެވެ.

މިމައްސަލަ ގަނޑުގެ ތެރެއިން އިންޑިޔާ އިން ވަނީ ކެނެޑާގެ ރައްޔިތުންނަށް އެޤައުމުގެ ވިސާ ދޫކުރުން ހުއްޓައިލައިފައެވެ.

އެގޮތުން އިންޑިޔާގައި ހުރި ކެނެޑާގެ ޑިޕްލޮމޭޓް އެޤައުމުން ބޭރުކޮށްލައިފައިވާއިރު، ކެނެޑާގައި ހުރި އިންޑިޔާގެ އިސް ޑިޕްލޮމޭޓަކުވެސް ވަނީ އެޤައުމުން ބޭރު ކޮށްފައެވެ.

އަދި މީގެ އިތުރުން  އިންޑިޔާ ސަރުކާރުން ކެނެޑާއަށް ދިޔުމާއި ގޮސް އުޅުމުގައި ސަމާލުވުމަށް ވަނީ އިންޑިޔާގެ ރައްޔިތުންނަށް އިލްތިމާސް ކޮށްފައެވެ. އެއާއި ގުޅިގެން އޭގެ ޖަވާބެއްގެ ގޮތުން ކެނެޑާއިން ވަނީ ކެނެޑާއަކީ ރައްކާތެރި އަމާން ޤައުމެއް ކަމަށް ބުނެ ކެނެޑާގެ ރައްޔިތުން ދަތުރުކުރުމުގައި އިންޑިޔާއަށް މަޑު ކުރުމުގައި ޓެރަރިސްޓު ހަމަލާއެއް ދީފާނެތީ ޚާއްސަ ސަމާލުކަމެއް ދިނުމަށް އަންގައިފައެވެ.