2024 ވަނަ އަހަރަށް ލަފާ ކުރާ ދައުލަތުގެ ބަޖެޓުގެ މަސައްކަތްތައް ކުރުމަށް 7 ބޭފުޅުން ހިމެނޭ ކޮމިޓީ އެއް އެކުލަވާލައިފާ ވާކަމަށް އިންތިޤާލީ ތަރުޖަމާނު މުހަންމަދު ފިރުޒުލް ވިދާޅުވެއްޖެ އެވެ.

ސަރުކާރު ބަދަލުކުރުމުގައި އިންތިޤާލީ މަރުހަލާގެ މަސައްކަތްތައް ކުރިއަށްދާ ގޮތާއި ގުޅޭގޮތުން މީޑިއާއަށް މައުލޫމާތު ދިނުމަށް ހޯމަ ދުވަހު ބޭއްވި ޕްރެސް ކޮންފަރެންސްގައި ވާހަކަދައްކަވަމުން ފިރުޒުލް ވިދާޅުވީ 2024 ވަނަ އަހަރުގެ ބަޖެޓް އެކުލަވާލުމުގެ މަސަތްކަތް ފަށައިގެން މިހާރު ކުރިއަށްދާ ކަމަށެވެ.

އެކަމަށްޓަކައި 7 މީހުންގެ ކޮމިޓީ އެއް އެކުލަވާލާފައި ވާކަމަށް ވެސް އޭނާ ވިދާޅުވެފައެވެ.

މީގެ އިތުރުން ކޮމިޓީގެ މަސަތްކަތަށް ބޭނުންވާ މައުލޫމާތުތަށް ހޯދައި ދިނުމަށް ފިނޭންސް މިނިސްޓްރީ އަށް އެދިފައިވާނެ ކަމަށާއި، އަދި މައުލޫމާތު ތަކާއި އެކު އެ ފަރާތްތަކާއެކު ބައްދަލުވުމަށް ވެސް އިންތިޤާލީ ކޮމެޓީން އެދިފައިވާނެކަމަށް ފިރުޒުލް ވިދާޅުވި އެވެ. 

ފިރުޒުލް އިތުރަށް ވިދާޅުވީ އިންތިގާލީ ކޮމެޓީތަކުން ސަރުކާރުގެ އެކި އިދާރާތަކަށް މިއަދުން ފެށިގެން ޒިޔާރާތްކުރަމުންދާނެ ކަމަށެވެ. އަދި ވުޒާރާތަކުގެ ހާލަތު ބެލުމުގެ މަސައްކަތްތައް ކުރަމުންދާނެ ކަމަށެވެ.