ސަރުކާރު ބަދަލުވުމުގެ އިންތިގާލީ މަރުހަލާ ކުރިއަށް ދަނިކޮށް ސަފީރުން އައްޔަން ކުރުން ފަދަ ކަންކަން ކުރުމުން ކުރިއަށް އޮތް ސަރުކާރަށް ދަތިތަކެއް ކުރިމަތިވާނެ ކަމަށް އިންތިޚާބީ ރައީސުލްޖުމްހޫރިއްޔާގެ އޮފީހުގެ ތަރުޖަމާން މުޙައްމަދު ފިރުޒުލް ވިދާޅުވެއްޖެއެވެ.

މިއަދު އޮތް ނޫސްވެރިންގެ ބައްދަލުވުމެއްގައި ފިރުޒުލް ވަނީ އިންތިޚާބީ ރައީސް ޑރ.މުޙައްމަދު މުޢިއްޒު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ފޮނުއްވި ސިޓީފުޅެއްގައި، ސަރުކާރު ބަދަލުވުމުގެ މަރުހަލާގައި ބައެއް ކަންކަން ނުކުރެއްވުމަށް އަންގަވާފައިވާކަން ފާހަގަކުރައްވާފައެވެ.

އެގޮތުން، އައު މަޝްރޫޢުތައް ފެށުމާއި، އައު އިންވެސްޓުމެންޓުތައް ކުރުމާއި، ބިންތައް ކުއްޔަށް ދޫކޮށް ވިއްކުމާއި، ކޮންމެހެން މިވަގުތު ބޭނުންވާ ވަޒީފާތައް ފިޔަވައި އިތުރު ވަޒީފާތައް އުފެއްދުން ފަދަ ކަންކަން ހުއްޓައިލެއްވުމަށް އެދިވަޑައިގެންފައިވާކަމަށް ފިރުޒުލް ވިދާޅުވި އެވެ.

ކަންމިހެން ހުރިނަމަވެސް ދެ ގައުމަކަށް ސަފީރުން އައްޔަން ކުރުމަށް މިއަދުގެ މަޖިލީހުގައި ހުށަހެޅުނުކަން ފާހަގަކުރައްވައި ފިރުޒުލް ވިދާޅުވީ، ސަފީރަކު އައްޔަނު ކުރުމަކީ ހަމައެކަނި ރާއްޖެއާއި ގުޅުންހުރި ކަމެއް ނޫން ކަމަށެވެ. އަދި ވެރިކަން ބަދަލުކުރުމަށް ކުޑަ ދުވަސްކޮޅަކަށްވެފައިވަނިކޮށް، ސަފީރުން އައްޔަން ކުރުން ފަދަ ކަންކަން ކުރުމަކީ އަލަަށް އަންނަ ސަރުކާރަށް ހުރަސްތައް ކުރިމަތިވާނެ ކަމެއް ކަމަށެވެ.

މީގެ އިތުރުން ފިރުޒުލް ވަނީ، ބައެއް ރަށްރަށުގައި ފަށާފައި ހުރި މަޝްރޫއުތައް ސަރުކާރުން ހުއްޓާލުމަށްފަހު އެކަން ކުރީ އިންތިހާބީ ރައީސްގެ އެދިވަޑައިގަތުމަށް ކަމަށް ބުނަމުން އަންނަކަން ފާހަގަ ކުރައްވާފައެވެ. އެހެން ނަމަވެސް، އެންތިޚާބީ ރައީސް އެދި ލައްވާފައި ވަނީ އައު މަޝްރޫޢުއެއް ނުފަށަން ކަމަށާ، ފެށިފައި ހުރި މަޝްރޫއުތައް ހުއްޓާލުމަށް ނާންގަވާ ކަމަށް ފިރުޒުލް ވިދާޅުވި އެވެ. 

މިއަދު މަޖިލީހަށް ހުށަހަޅާފައިވަނީ އެކުވެރި އަރަބި އިމާރާތަށް ރާއްޖެއިން ކަނޑައަޅުއްވާ ސަފީރު ކަމަށް މއ. ރުއްކުރި، މަރްޔަމް މިދްފާ ނައީމް އަދި ބަންގްލަދޭޝަށް ރާއްޖެއިން ކަނޑައަޅުއްވާ ސަފީރު ކަމަށް ސ. ހުޅުދޫ، އަސަރީގެ، ޝިއުނީން ރަޝީދު އައްޔަންކުރުމަށެވެ.