ފަލަސްތީނުގެ ރައްޔިތުންނަށް އަމާޒުކޮށް އިޒްރޭލުގެ ޒަޔަނިސްޓް ހަރުކަށި ޔަހޫދީން ދެމުން ގެންދާ ހަމަލާތަކާއި ދެކޮޅަށް، ފަލަސްތީންގެ މިނިވަން ކަމަށް ތާއީދު ކުރާކަން ހާމަކުރުމުގެ ގޮތުން އުރީދޫގެ މައި އިމާރާތް ފަލަސްތީނުގެ ދިދައިން ދިއްލާލައިފިއެވެ. 

އުރީދޫގެ މުޅި އިމާރާތް ފަލަސްތީނުގެ ދިދައިގެ ކުލަ ތަކަށް ޚާއްސަކޮށް ދިވެހިން ފަލަސްތީނާއި އެކުވާކަން ހާމަކުރަމުން، ފަލަސްތީނުގެ ދިދަ ވެސް ހިމެނޭހެން އުރީދުގެ މައި އިމާރާތް ދިއްްލާލާފައި ވާއިރު، އުރީދޫއިން ބުނަމުންދިޔައީ "އަހަރެމެންގެ ހިތްތައް ވަނީ ފަލަސްތީނާއި އެކު" ގައި ކަމަށެވެ. 

މީގެ ކުރިންވެސް ފަލަސްޠީނާއި އެކު ވާކަން ދައްކާލުމަށް އުރީދޫގެ މައި އިމާރާތް މިފަދައިން ދިއްލާލާފައި ވާއިރު، ފަލަސްޠީނަށް އިންޓަރނެޓް ގެ ޚިދުމަތް ފޯރުކޮށްދެނީ ވެސް އުރީދޫއިންކަން ފާހަގަކޮށްލަންޖެހެއެވެ.

Advertisement

އުރީދޫގެ އިމާރާތުގެ އިތުރުން ދިވެހި ގައުމީ ދިފާއީ ބާރުގެ މައި ސްކްރީންވެސް މިހާރު ވަނީ ފަލަސްތީނުގެ ދިދައިން ދިއްލާލާފައެވެ. 

ފަލަސްތީނާއި އެ ގައުމަށް ގަދަކަމުން ވެރިވެގެންފައިވާ ޔަހޫދީންނާ ދެމެދު ހިނގަމުންދާ ހަނގުރާމައިގައި، ޔަހޫދީންގެ ހަމަލާތަކުގައި ޝަހީދުވި މީހުންގެ ޢަދަދު 1200 އަށް އަރައިފައިވާ ކަމަށް ފަލަސްޠީނުގެ ސިއްޚީ ވުޒާރާއިން އެންމެ ފަހުން ހާމަކުރި އަދާހަމަތަކުގައި ބުނެފައިވެއެވެ. އޭގެ ތެރެއިންވެސް %60 އަށްވުރެ ގިނައީ އަންހެނުންނާއި ކުޑަކުދިންކަން އަދި އުމުރުން ދުވަސްވީ މީހުންކަން ފާހަގަކޮށްލަންޖެހެއެވެ.