ޕްލާސްޓިކް ކޮތަޅު ބޮނޑިން ބޮޑު ފީއެއް ނަގާ މައްސަލަ ހައްލުކުރަން ސަރުކާރުގެ ފަރާތުން ކުނި މެނޭޖްކުރުމުގެ ގާނޫނަށް ހުށަހެޅި އިސްލާހު ދިރާސާކުރުމަށް ކޮމެޓީއަށް ދޮނުވައިފިއެވެ.
ރައްޔިތުންގެ މަޖިލީހުން މިދިޔަ ނޮވެމްބަރު މަހު ފާސްކުރި ކުނި މެނޭޖްކުރުމުގެ ބިލު ގާނޫނަކަށްވެ، މާޗް މަހުގެ ފަހު ހަފްތާއިން ފެށިގެން ޕްލާސްޓިކް ކޮތަޅަކުން 2ރ.ގެ ފީއެއް ނަގަން ވަނީ ފަށައިފައެވެ. އެ ބަދަލާ އެކު، ކޮތަޅު ބޮނޑިން ވެސް އަދި ބާޒާރު ކުރާ އިރު ވެސް ކޮތަޅުން ފީ ނަގަމުން ދާއިރު، ހޯލްސޭލް ފިހާރަތަކުން ވިއްކާ ކޮތަޅުގެ އަގު އެތައް ގުނައަކަށް ވަނީ ބޮޑުވެފަ އެވެ.
އެ މައްސަލަ ހައްލުކުރުމަށް ސަރުކާރުން މިދިޔަ މާޗް މަހު ސަރުކާރުން މަޖިލީހަށް ހުށަހެޅި ބިލު ބަލައިގަތުމަށް މިއަދުގެ މަޖިލީސް ޖަލްސާގަައި ފާސްކުރީ ވޯޓުގައި ބައިވެރިވި މެމްބަރުންގެ ތެރެއިން 40 މެމްބަރުންގެ ވޯޓާ އެކުއެވެ. އެއީ ޓެކްސް އާ ގުޅުންހުރި ބިލަކަށްވާތީ، އެ ބިލު ދިރާސާކުރުމުގެ މަސައްކަތް ކުރާނީ މުޅި މަޖިލީހުގެ ކޮމިޓީންނެވެ.
ކުނި މެނޭޖްކުރުމުގެ ގާނޫނު މިހާރު އޮންނަ ގޮތުން ވިޔަފާރީގެ ކޮންމެ ހަރަކާތަކުން ދޫކުރާ ނުވަތަ ވިއްކާ ޕްލާސްޓިކް ކޮތަޅަކުން 2 ރުފިޔާގެ ފީއެއް ނަގަން ޖެހޭ ކަމަށް ގާނޫނުގައި އޮތުމުން އާއްމުކޮށް ކޮތަޅު ލިބެނީ 6 ރުފިޔާގެ ރޭޓުންނެވެ. އަދި 50 ނުވަތަ އެއަށް ވުރެ ގިނަ ކޮތަޅު ހިމެނޭ ކޮތަޅު ބޮނޑިން ޓެކްސް ނެގުމުގެ ސަބަބުން ކޮތަޅުގެ އަގު އިންތިހާއަށް ވަނީ އުފުލިފައެވެ. މި މައްސަލަ ހައްލުކުރުމަށް ސަރުކާރުން މިދިޔަ މާޗުގައި ހުށަހެޅި ބިލު އޭޕްރީލް މަހުގެ ތެރޭގައި މަޖިލިހުގައި އެޖެންޑާ ކުރި ނަމަވެސް އެ މަޖިލިހުގެ ފުރަތަމަ ދައުރު ނިންމާލައިފައިވަނީ ބިލު ކޮމެޓީއަށް ނުފޮނުވައެވެ.
މި ބިލު ދިރާސާކުރުމަށް މިހާރު ކޮމިޓީއަށް ފޮނުވާފައިވާ އިރު، މަޖިލީހުގެ އެންވަޔަރަމެންޓް ކޮމިޓީގެ މުގައްރިރު، ހޯރަފުށީ ދާއިރާގެ މެމްބަރު އަހުމަދު ސަލީމް ވަނީ ކޮތަޅުފީ، 50 ލާރިއަށް ކުޑަކުރުމަށް ހުށަހަޅުއްވައިފައެވެ. އޭގެ އިތުރުން އޭނާގެ އިސްލާހުގައި ހުށަހަޅާފައިވަނީ ގަނޑުކޮށް ކޮތަޅު ގަތަސް ބިން ލައިނާ ފަދަ ބޭނުންތަކަށް ގަނޑުކުރި މަސް ނުވަތަ ރޯމަސް ފަދަ ތަކެތި އެޅުމުގެ ބޭނުމަށް ގަންނަ ކޮތަޅުން ނެގޭ ޓެކްސް އެއިން އިސްތިންނާ ކުރުމަށެވެ. އަދި ރީޓެއިލް ފިހާރަތަކާ ކެފޭތަކަށް އިދާރީ ގޮތުން ބުރަ ނުވާނޭ ފަދަ ގޮތަކަށް ޔުނިފޯމް ޓެކްސްއެއްގެ ގޮތަށް ޓެކްސް ތައާރަފް ކުރުމުގެ އިތުރުން ކޮތަޅަށް ނަގާ ފީ 50 ލާރިއަށް ދަށްކުރުމާއި ކޮންމެ އަހަރަކު އެ ފީ މުރާޖާ ކުރުމަށްވެސް އެ އިސްލާހުގައި ވެއެވެ.
Advertisement
This content is created and paid for by advertisers and does not involve Voice Journalists
