ފަލަސްޠީނުގެ ބިންތަކަށް ގަދަކަމުން ވެރިވެގެން ދިރިއުޅެމުންދާ ހައްދުފަހަނައަޅާފައިވާ އިސްރާއީލުން ހިންގަމުންގެންދާ ގަތުލު އާއްމުގައި ފަލަސްޠީނަށް 6 ދުވަހުގެ ތެރޭގައި 6000 ބޮން އަޅާފައިވާކަން ހާމަވެއްޖެއެވެ. 

ފަލަސްޠީނުގެ މިނިވަންކަމަށްޓަކައި ޖިހާދު ކުރަމުންދާ ހަމާސްގެ މުޖާހިދުން، އެގައުމަށް، އެގައުމުގެ ބިންތައް ފޭރިގަނެގެން ދިރިއުޅެމުންދާ އިސްރާއީލްގެ ޔަހޫދީންނަށް ދިން ކުއްލި ހަމަލާއަށް މިހާރު އެއް ހަފްތާއަށްވުރެ ގިނަ ދުވަސްވެގެން ގޮސްފައިވާއިރު، ހަމާސްގެ ހަމަލާތަކުގެ ރައްދުގައި އިސްރާއީލް ސިފައިންވެސް ވަނީ ގިނަ ހަމަލާތަކެއް ފަލަސްޠީނުގެ ޢާއްމުންނަށް އަމާޒުކޮށް ދީފައެވެ. 

އެގޮތުން ދިން ހަމަލާތަކުގެ ތެރެއިން ފުރަތަމަ 6 ދުވަހުވެސް ޣައްޒާއަށް އަމާޒުކޮށް 6000 ބޮން، އިސްރާއީލް ސިފައިން އަޅާފައިވާ ކަމަށް އެމީހުން ވަނީ މަޢުލޫމާތުދީފައެވެ. އެ ބޮން ތަކުގެ ބަރުދަން 4000 ޓަނަށް އަރާއިރު، އެ ހަމަލާތަކުގެ ޝިކާރައަކަށްވެ، އެ ހަ ދުވަސް ތެރޭގައިވެސް ގާތް ގަނޑަކަށް 1400 މުސްލިމުން ވަނީ ޝަހީދުވެފައެވެ. އޭގެތެރޭގައި 447 ކުޑަކުދިންނާއި، 248 އަންހެނުންގެ އިތުރުން 10 ސިއްހީ ފަރުވާދޭ އޮފިޝަލުން ހިމެނެއެވެ.

އެންމެ ހަ ދުވަސްތެރޭގައި އިސްރާއީލް ސިފައިން ހިންގި މިގަތުލު ޢާއްމަކީ ފަހުގެެ ތާރީޚުގައިވެސް ހިންގުނު އެންމެ ލާއިންސާނީ ޖަރީމާތައްކަން ފާހަގަ ކޮށްލަންޖެހެއެވެ. 

އެގޮތުން، މި ޖަރީމާތައް މީގެ ކުރިން 2019 ވަނަ އަހަރުގެ ތެރޭގައި އެމެރިކާއިން އަފްޣާނިސްތާނަށް ދިން ޓެރެރިސްޓް ހަމަލާ އާއި އަޅާ ކިޔާލާނަމަ، ހައްދުފަހަނަޅައި ދިޔުމުގައި އިސްރާއީލް އެމެރިކާއަށް ވުރެވެސް މިވަނީ ކުރި އަރާފައެވެ. އެގޮތުން، އެމެރިކާއިން އަފްޣާނިސްތާނަށް އެއް އަހަރު ދުވަހުގެ ތެރޭގައި އެޅި ބޮމާއި ގާތްގަނޑަކަށް އެއް ވަރަށް އިސްރާއީލް އެންމެ ހަ ދުވަސް ތެރޭގައި ޣައްޒާއަށް މިވަނީ ބޮން އަޅާފައެވެ. މިފަދަ ގިނަ ބޮންތަކެއް މަދު ދުވާސްކޮޅެއްގެ ތެރޭގައި އެޅުމުން އޭގެ ގެއްލުމާއި ނުރައްކާތެރިކަން ނިޔުކުލިއާރ ބޮމަކުން ލިބޭ ގެއްލުމުގެ 1/4 އާއި އަރާހަމަ ކުރާ ކަމަށް އިންސާނީ ހައްގުތަކަށް ވާކާލަތުކުރާ ބައެއް ޖަމިއްޔާތަކުން ބުނެއެވެ. 

އިސްރާއީލްގެ މި ލާއިންސާނީ ޖަރީމާތައްކުން ސަލާމަތް ވުމަށް، ޣައްޒާގެ އިރުމަތީގައި ދިރިއުޅެމުންދާ މުސްލިމުން އެ ހުޅަނގަށް ދިޔުމަށް އެންމެ 24 ގަޑިއިރުގެ މުއްދަތެއް ދިނުމަށްފަހު، އެގޮތުން މުސްލިމުން ހިޖުރަ ކުރަން ފަށާފައި ވަނިކޮށް، އެ ހިޖުރަ ކުރަމުންދިޔަ މުސްލިމުންނަށް އަމާޒުކޮށްވެސް އިސްރާއީލުން ވަނީ ހަމަލާދީފައެވެ. 

މި ހަނގުރާމަ ނިމޭނެ ކަމުގެ ކޮޅުމަތިވެސް ފެންނަން ނެތް އިރު، މިހާތަނަށް ހަނގުރާމައިގައި ޖުމުލަ 3000 އަށްވުރެ ގިނަ މުސްލިމުން ޝަހީދުވެ 10,000 އަށްވުރެ ގިނަ މީހުން ވަނީ ޒަޚަމްވެފައެވެ.