ރ ވާދޫ ޒުވާނުން އިސްނަގައިގެން ފަލަސްޠީނަށް އެހީވުމަށް ކުރިއަށް ގެންދިޔަ ހަރަކާތުން ލިބުނު ފައިސާ އިންޓަރނޭޝަނަލް އެއިޑް ކެމްޕޭނާއި ހަވާލުކޮށްފިއެވެ.

ވާދޫއަށް ނިސްބަތްވާ ޒުވާނުން އިސްނަގައިގެން ކުރިއަށް ގެންދިޔަ މިހަރަކާތް ތަކުގައި ހުކުރު ދުވަހު ހެނދުނުން ފެށިގެން އިރުއޮއްސުމާއި ހަމައަށް ފަންޑު ފޮއްޓެއް ވަނީ އެރަށުގައި ބަހައްޓައިފައެވެ. ފަންޑު ހޯދުމަށް ބެހެއްޓި ފޮއްޓަށް ޖުމްލަ 41،453.5 ރުފިޔާ ލިބިފައިވެއެވެ.

ވަދޫއަކީ ނިސްބަތުން ކުޑަ އާބާދީއެއް އޮންނަ ރަށެކެވެ. އެ ރަށުގެ ކުޑަ އާބާދީގެ ތެރެއިން ރަށުގައި ދިރިއުޅެނީ 500 އެއްހާ މީހުންނެވެ.

Advertisement

ފަންޑު ހޯދުމަށް ބެހެއްޓި ފަންޑުފޮށިކައިރީގައި ކުޑަ ކުދިންތަކެއް. ފޮޓޯ:އިއްބޭސް ފޮޓޯ

ފަންޑުފޮށި ބަހައްޓައިގެން ފަންޑު ހޯދުމުގެ އިތުރުން ވާދޫގައި އިއްޔެ ހަވީރުވަނީ ރަށުގެ ކުދިބޮޑު ރައްޔިތުން ބައިވެރިވެ ހިނގާލުމެއް ކުރިއަށް ގެންގޮސްފައެވެ. އަދި ހަރަކާތް ނިންމާލީ ރައްޔިތުން އެއްކޮށް ކުރި ދުޢާއަކުންނެވެ.

މި ހަރަކާތް އިންތިޒާމް ކޮށްފައިވަނީ ވާދޫގެ ރައްޔިތުންގެ ތެރެއިން މާލޭގައި އުޅޭ ޒުވާނުންތަކެކެވެ.

މި ޙަރަކާތް އިންތިޒާމް ކުރުމުގައި އެންމެ އިސް ދައުރެއް އަދާކުރެއްވި މުޙައްމަދު ޒިދާން "ވޮއިސް" އަށް މަޢުލޫމާތު ދެއްވަމުން ވިދާޅުވީ މި ހަރަކާތަކީ އެރަށުގެ ޒުވާނުން އިސްނަގައިގެން ކައުންސިލާއި އެއްވެސް ޖަމިއްޔާއެއްގެ ބައިވެރިވުމެއް ނެތި ކުރިއަށް ގެންދެވުނު ހަރަކާތެއް ކަމަށެވެ.

"ފުރިހަމަ ކާމިޔާބު ހަރަކާތަކަށް މިވީ ގިނަ ބައެއްގެ އެއްބާރުލުން ލިބިގެންކަން ޝައްކެތް ނެތް، މިކަމުގައި ވާދޫ ހުކުރު މިސްކިތުގެ އިމާމް މުޙައްމަދު ނަޖީބު، ހުސައިން ނަސީމް، މުޙައްމަދު އަރީފް، އިބްރާހީމް ޝަހީމްގެ ފަރާތުން ލިބުނު އެއްބާރުލުމަށް ޝުކުރު އަދާކުރަން، ވާދޫގެ ޒުވާނުންނަކީ އަބަދުވެސް މިފަދަ ކަންކަމުގައި ނަމޫނާ ބައެއް، ޒުވާނުންގެ އެހީއާ ނުލައި މި އިވެންޓް މިގޮތަށް ކުރިއަށް ނުގެންދެވުނީސް، އިޖުމާލީ ގޮތެއްގައި ރަށުގެ އެންމެންނަށް ޝުކުރިއްޔާ" ޒިދާން ވިދާޅުވިއެވެ.

ޒިދާން ވިދާޅުވީ މިހަރަކާތައް ރަށުގެ ވިޔަފާރިތަކުން އެހީތެރިކަން ފޯރުކޮށްދެއްވައިފައިވާ ކަމަށެވެ.

ޒިދާން އިތުރަށް ވިދާޅުވީ އިވެންޓްގެ ފޮޓޯ ގްރާފިންގެ ކަންތައް ކޮށްދެއްވި އިއްބޭސް ފޮޓޯގްރަފީ އިން އެމަސައްކަތް ކޮށްދެއްވައިފައިވަނީ ހިލޭ ސާބަހަށް ކަމަށެވެ.

ކާމިޔާބުކަމާއެކު އެ ހަރަކާތް ކުރިއަށް ގެންދެވުނީތީ އުފާކުރާ ކަމަށާއި، އެ ހަރަކާތަށް ވާދޫގެ ރައްޔިތުން ދިން އެއްބާރުލުން ފާހަގަކޮށް ޝުކުރުއދާކުރާކަމަށް ވެސް އޭނާ ވަނީ ބުނެފައެވެ.