އެކަނި މަސްވެރިކަމަށް ނިކުމެ އުޅެނިކޮށް ގެއްލުނު އދ. ދަނގެތި، ނޫލައިޓް / ޔޫސުފް އިބްރާހިމް (ޔޫސުއްބެ) ހޯދަން ތިންލައްކަ އަކަމީޓަރަށްވުރެ ބޮޑު ސަރަހައްދެއް ބަލައިފި އެވެ. 

ޔޫސުއްބެ ގެއްލިގެން ރިޕޯޓުކޮށްފައި ވަނީ މި މަހުގެ 13 ވަނަ ދުވަހުގައެވެ. އެ ހިސާބުން، އެމީހާ ހޯދުމުގެ މަސައްކަތް ދިފާއީ ބާރުން ފަށާފައިވާއިރު، އެ މަސައްކަތުގެ ތަފްސީލު ހާމަކުރަމުން އެމްއެންޑީއެފުން ބުނީ ޔޫސުއްބެ ހޯދަން ކޯސްޓްގާޑުގެ އުޅަނދުތައް ބޭނުން ކޮށްގެން މިހާތަނަށް 664 އަކަ މޭލު ސަރަހައްދު ބަލާފައިވާ ކަމަށެވެ. 

އެ މަސައްކަތުގައި ކޯސްޓްގާޑު ޑައިވަރުން 376،850 އަކަ ނޯޓިކަލް މޭލު ކަވަރުކޮށްފައިވާއިރު ޑޯނިއާ އެއާކްރާފްޓުން 907 އަކަ މޭލު ސަރަހައްދެއް ބަލާފައިވާކަން ވެސް ދިފާއީ ބާރުން ހާމަކޮށްފައި ވެއެވެ. 

ކުޑަ ދޯންޏެއްގައި ޔޫސުއްބެ ވަދު މަސްވެރި ކަމަށް ނުކުތީ މި މަހުގެ 13 ވަނަ ދުވަހުގެ ރޭ ފަތިހު އެވެ. އުމުރުން 68 އަހަރުގެ ޔޫސުއްބެ މަހަށް ނުކުތީ އެ އަތޮޅު އޮރިމަސް ފަޅުގެ އިރުމަތި ފަރާތަށެވެ. އެ ކުޑަ ދޯނި އދ. ރަންގަލި އުތުރު ކަނޑުއޮޅިން ދަނިކޮށް އެންމެ ފަހުން ފެނުނީ އެ ދުވަހުގެ 9:00 އާއި 9:30 އާ ދެމުދު ވަގުތެއްގަ އެވެ.

ޔޫސުއްބެ އެންމެ ފަހުން ފެނުނުއިރު އުޅުނީ ބޮއި އަޅާށެވެ. ނަމަވެސް އޭގެ ދެ ގަޑިއެއްހާއިރު ފަހުން ޔޫސުބެ ދަތުރުކުރި ދޯނި ފެނުނުއިރު އޭނާއެއް ނެތެވެ. ޔޫސުއްބެ އެންމެ ފަހުން ލައިގެން ހުރީ ރަތް ކުލައިގެ ޓީޝާޓެކެވެ.

ޔޫސުއްބެ ގެއްލިގެން ރިޕޯޓު ކުރުމާއި އެކު، އެ ރަށުގެ ރައްޔިތުންނާއި، ރަށާއި ކައިރި ރިސޯޓުތަކުގެ ޑައިވަރުން ގުޅިގެން ވަނީ އޭނާ ހޯދުމުގެ މަސައްކަތް ފަށާފައެވެ. އެގޮތުން މެދުކެނޑުމެއް ނެތި ތިން ދުވަސް ވަންދެން ޔޫސުއްބެ ހޯދުމުގެ މަސަައްކަތް އެ ފަރާތްތަކުން ކޮށްފައިވާއިރު އެފަހުން ވަނީ އެ މަސައްކަތް ހުއްޓާލާފަ އެވެ. 

އެހެން ނަމަވެސް އަދިވެސް ދިފާއީ ބާރުން ޔޫސުއްބެ ހޯދުމުގެ މަސައްކަތް ކުރަމުންދާއިރު، އާންމު ގޮތެއްގައި ދިފާއީ ބާރުންވެސް މިފަދަ އޮޕަރޭޝަން ކުރިއަށް ގެންދަނީ 72 ގަޑިއިރަށްކަން ފާހަގަކޮށްލެވެ އެވެ.