2024 ވަނަ އަހަރަށް ލަފާކޮށް ހުށައަޅާ ދައުލަތުގެ ބަޖެޓުގެ ތެރެއިން އަލަށް އިންތިޚާބުވި ސަރުކާރުން ބޭނުންވާ ކަންކަން ހިމެނުމަށް ލިބެނީ ވަރަށް ހަނި ޖާގައެއްކަމަށް އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވެއްޖެ އެވެ.
އިންތިޚާބީ ރައީސުލްޖުމްހޫރިއްޔާގެ އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަަވަމުން ފިރުޒުލް ވަނީ އަންނަ އަހަރުގެ ބަޖެޓުގައި އާ ސަރުކާރުން ބޭނުންވާ ކަންކަން ހިމެނުމުގައި ހުރި ބައެއް ގޮންޖެހުންތަކަށް އަލިއަޅުވާލައްވާފަ އެވެ.
އެގޮތުން ރައީސް އިބްރާހިމް މުހައްމަދު ޞާލިހުގެ ސަރުކާރުން މިއަހަރުގެ ބަޖެޓުގެ އިތުރުން ސަޕްލިމެންޓްރީ ބަޖެޓެއް ހުށައަޅުއްވާފައިވާއިރު، އެއީ އިންތިޚާބީ ރައީސް ޑރ މުހައްމަދު މުއިއްޒުއާއި އެއްވެސް މަޝްވަރާއެއް ކުރެއްވުމަށްފަހު ހުށައެޅުއްވި ބަޖެޓެއް ނޫންކަން ފިރުޒުލް ފާހަގަކުރެއްވި އެވެ.
އޭގެ އިތުރުން އޭނާ ވިދާޅުވީ 2024 ވަނަ އަހަރުގެ ބަޖެޓަށް އާ ސަރުކާރުން ހުށައަޅަން ބޭނުންވާ ކަންތައްތައް ހުށައެޅުމަށް ލިބެނީ ވަރަށް ހަނި ޖާގައެއް ކަމަށެވެ. އަދި މައިގަނޑު ގޮތެއްގައި އެ ފުރުސަތުގައި އާ ސަރުކާރުން ހިމަނާނީ ފުރަތަމަ 100 ދުވަހުގެ ޕްލޭނުގައި ހިމެނޭ ކަންކަން ފުއްދުމަށް ބޭނުންވާ ބަޖެޓުކަމަށް ފިރުޒުލް ވިދާޅުވި އެވެ.
"މި ލިބުނު ކުޑަ ވިންޑޯގެ ތެރެއިން އަޅުގަނޑުމެންގެ މައިގަނޑު އަމާޒަކަށް ވާނީ އަލަށް ފެށިގެންދާ ސަރުކާރުގެ 100 ދުވަހުގެ ޕްލޭނަށް ބޭނުންވާ މަސައްކަތްތަކުގެ ބިންގާ އެޅިގެން އެ ކަންކަމަށް މަގުފަހިކުރުން"
އިންތިގާލީ ތަރުޖަމާނު ފިރުޒުލް
ފިރުޒުލް ވިދާޅުވީ 2024 އަށް ލަފާކުރާ ބަޖެޓުގައި އާ ސަރުކާރުން ހިމަނާނެ ކަންތައްތަކެއް އެކުލަވާލުމަށް އިންތިޚާބީ ރައީސް އެކުލަވާލައްވާފައިވާ ބެޖޓު ކޮމެޓީއިން ފިނޭންސް މިނިސްޓްރީގެ ޓެކްނިކަލް ޓީމަކާއި އެކު މަސައްކަތް ކުރައްވަމުންދާ ކަމަށެވެ.
ޖުމްލަ ގޮތެއްގައި ބަޖެޓުއެކުލަވާލުމުގައި އާ ސަރުކާރުގެ ވިސްނުމަކަށް ވާނީ، ވައުދުތައް ފުއްދުމާއެކު 2024 ވަނަ އަހަރަށް އެކަނި ވިސްނުމުގެ ބަދަލުގައި ދުރަށް ވިސްނައިގެން އެންމެ ފަހި އުއްމީދީ މަގަކަށް ގެންދިއުމަށްކަމަށް ފިރުޒުލް ވިދާޅުވި އެވެ.
އޭގެ އިތުރުން ބަޖެޓުގެ މަސައްކަތް ކުރަމުންދާއިރު، ހަމަހަމަކޮށް ރަށްރަށުގައި ހިނގާ މަޝްރޫއުތައް ކުރިއަށް ގެންދެވޭނެގޮތަށް ބަޖެޓުގެ ތަސައްވުރު ހިމެނޭ ކަންތައްތަކަށް އިސްކަންދެއްވާނެކަމަށް ފިރުޒުލް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
