ހއ. އަތޮޅުގައި ދަތުރުކުރަމުން ދިޔަ ލޯންޗަކާއި ދޯންޏެއް ޖެހި ހިނގި އެކްސިޑެންޓެއްގައި މީހަކު ނިޔާވެއްޖެ އެވެ.

އިހަވަންދޫ ކައިރީގައި އޮންނަ ހުވަހަންދޫ ކައިރީގައި ހިނގި މި އެކްސިޑެންޓުގައި 4 މީހަކަށް އަނިޔާވި އެވެ. އޭގެތެރެއިން ސީރިއަސް އަނިޔާތަކެއްވި މީހާ ނިޔާވެފައިވާކަމަށް އިހަވަންދޫ ސިއްޙީ މަރުކަޒުން ވަނީ ބުނެފައެވެ.

ނިޔާވެފައިވަނީ ދޯނީގެ ކެޕްޓަނު، އުމުރުން 68 އަހަރުގެ އަބްދުއްރަޝީދު މުޙައްމަދެވެ.

Advertisement

އިހަވަންދޫ ސިއްޙީ މަރުކަޒުން ބުނިގޮތުގައި ލޯންޗަކާއި ދޯންޏެއް ޖެހި ހިނގި އެކްސިޑެންޓްގައި ސީރިއަސް އަނިޔާތަކެއްވެގެން އޭނާ އެމަރުކަޒަށް ގެނެސްފައިވަނީ ހޮނިހިރު ދުވަހުގެ ރޭ 19:30 ހާއިރުކަމަށެވެ. އަދި އޭނާ ނިޔާވީ ފަރުވާދެމުން ދަނިކޮށް ރޭ 20:15 ހާއިރު ކަމަށް ސިއްޙީ މަރުކަޒުން ވަނީ މއުލޫމާތު ދީފައެވެ.  

މިހާދިސާގައި އަނިޔާވި އިތުރު 3 ދިވެއްސަކަށް ފަރުވާދެމުންދާކަމަށާއި އެތަނުން ދެމީހެއްގެ ހާލު ރަނގަޅު ކަމަށާއި، ދެން އޮތް މީހާގެ ހާލު ސީރިއެސްވަމުން އަންނަ ކަމަށް ފުލުހުން ވަނީ މައުލޫމާތު ދީފައެވެ.

އެ ހާދިސާ ހިނގި ވަގުތު ދޯނީގައި ތިބީ ދެ މީހުންނެވެ. އަދި ލޯންޗުގައި ތިބީ ހަތަރު މީހުނެވެ. މި ހާދިސާގައި ލޯންޗަށާއި ދޯންޏަށް ވެސް ބޮޑެތި ގެއްލުންތައް ލިބިފައިވާކަމަށް މަޢުލޫމާތު ލިބެ އެވެ.

މިހާދިސާގައި އެކްސިޑެންޓްވި ލޯންޗަކީ ހދ. ނެއްލައިދޫއަށް ނިސްބަތްވާ ލޯންޗެއްކަމަށާއި އެއީ ހުއިފިލަނޑާ ނަގަން އާންމުކޮށް ބޭނުންކުރާ ލޯންޗެއް ކަމަށް އިހަވަންދޫ ކައުންސިލުން ބުނެފައި ވެއެވެ. އޭގެ އިތުރުން އެކްސިޑެންޓުވި ދޯންޏަކީ ހިބަރު މަސްވެރިކަން ކުރާ ދޯންޏެކެވެ.