ޖޫރިމަނާކޮށްގެން ދައުލަތަށް ހޯދި އާމްދަނީ 123 މިލިއަން ރުފިޔާއަށް އަރާފައިވާކަން ފިނޭންސް މިނިސްޓްރީގެ ތަފާސް ހިސާބުތަކުން ހާމަވެއްޖެ އެވެ.
ފިނޭންސް މިނިސްޓްރީން އާންމުކޮށްފައިވާ ތަފާސް ހިސާބުތަކުން ދައްކާ ގޮތުގައި މިދިޔަ މަހުގެ 12 ގެ ނިޔަލަށް ޖޫރިމަނާގެ ގޮތުގައި ދައުލަތަށް ލިބުނު އާމްދަނީ ވަނީ 123.4 މިލިއަނަށް އަރާފަ އެވެ.
މީ ޖޫރިމަނާގެ ގޮތުގައި ދައުލަތަށް ލިބޭނެކަމަށް މިއަހަރުގެ ބަޖެޓުގައި އަންދާޒާކޮށްފައިވާ އަދަދަށް ވުރެ ބޮޑު އާމްދަނީއެކެވެ. ޖޫރިމަނާގެ ގޮތުގައި މި އަހަރަށް ލިބޭނެކަމަށް ދައުލަތުން އަންދާޒާކޮށްފައި ވަނީ 82.7 މިލިއަން ރުފިޔާއެވެ. އެހެން ކަމުން މިއީ އަންދާޒާ ކުރި އަދަދަށް ވުރެ 40.7 މިލިއަން ރުފިޔާގެ އިތުރުވުމެކެވެ.
ވޭތުވެ ދިޔަ ދެ އަހަރުވެސް ޖޫރިމަނާގެ ގޮތުގައި ދައުލަތަށް ލިބޭނެކަމަށް އަންދާޒާކުރި އަދަދަށް ވުރެ ގިނައިން ލިބިފައިވާކަމަށް ތަފާސް ހިސާބުތަކުން ދައްކައެވެ. އެގޮތުން މިދިޔަ އަހަރު ޖޫރިމަނާކޮށްގެން ދައުލައަށް 62.4 މިލިއަން ރުފިޔާ ލިބޭނެކަމަށް އަންދާޒާކޮށްފައި ވީ ނަމަވެސް ޖުމްލަ 252.1 މިލިއަން ރުފިޔާ ވަނީ ލިބިފައެވެ.
ޖޫރިމަނާގެ ގޮތުގައި ދައުލަތަށް ބޮޑެތި އަދަދުތަކުން ލިބިފައިވާއިރު، އޭގެ ތެރޭގައި ގިނައީ ޓްރެފިކް ޖޫރިމަނާތައްކަން ފާހަގަކޮށްލެވެއެވެ. އެހެން ނަމަވެސް މި ސަރުކާރަކީ ޕާކު ކުރާނެ ތަނެއް ނުދައްކާ ޖޫރިމަނާ ނުކުރާނެކަމަށް ބުނެ ވައުވެގެން އައި ސަރުކާރެއްކަން ވެސް ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
