ރައްޔިތުންގެ މަޖިލީހުގެ 20 އިންސައަކީ ޕީޕީއެމް-ޕީއެންސީގެ އަންހެންބޭފުޅުންނަށް ވެގެންދިއުމަކީ ވަރަށް ބޮޑު އުންމީދެއް ކަމަށާއި، އެ ޓާގެޓު ހާސިލްކުރުމަށް މަޖިލީހަށް ކުރިމަތިލާ އަންހެނުން ސްޕޮންސާކޮށްދިނުމަށް ވިޔަފާރިވެރިންގެ ކިބައިން އިންތިޚާބީ ރައީސް ޑރ މުހައްމަދު މުއިއްޒު އެދިވަޑައިގެންފި އެވެ. 

އެމަނިކުފާނު މިފަދައިން އެދިވަޑައިގެންފައި ވަނީ މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ގެ ފަރާތުން ބޭއްވި ޖަލްސާގައި، ވިޔަފާރިވެރިން އެކި ސިނާއަތްތައް ކުރިއަރުވަން މަސައްކަތްކުރާއިރު ގައުމީ ވިސްނުން އިސްކުރުމަށް ބާރުއަޅުއްވާ ވާހަކަފުޅު ދައްކަވަމުން ނެވެ. 

ޑރ މުއިއްޒު ވިދާޅުވީ ގައުމީ ކަންކަން ނިންމާއިރު، އަދި ރައްޔިތުން ތަމްސީލުކުރުމުގައި އަންހެނުން ޝާމިލުކުރުމަކީ ގައުމުގެ މުސްތަގުބަލަށް ފައިދާކުރާނެ ކަމެއްކަމަށް ދެކިވަޑައިގަންނަވާ ކަމަށެވެ. 

Advertisement

ޤާނޫނުގައި އަންހެނުންނާއި ފިރިހެނުން ހަމަހަމަކަމަށް ބަޔާންކޮށްފައި އޮތް ނަމަވެސް އިންތިޚާބުތަކުގައި ވާދަކުރުމުގައި އަންހެނުންނަށް ބޮޑެތި ގޮންޖެހުންތަކެއް ހުރި ކަމަށާއި، އެ ގޮންޖެހުންތަކުން އަރައިގަތުމަށް އަންހެނުންނަށް އެހީތެރިކަން ފޯރުކޯށްދިނުމަކީ ކުރަން ޖެހޭ ކަމެއްކަމަށް ޑރ މުއިއްޒު ވިދާޅުވި އެވެ. 

އެއާއެކު އެމަނިކުފާނު ވަނީ މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ) ތަމްސީލުކުރައްވާ ވިޔަފާރިވެރިން އަދި އެ ނޫންވެސް ވިޔަފާރީގެ ދާއިރާގައި ހަރަކާތްތެރިވާ ފަރާތްތަކުން ރައްޔިތުންގެ މަޖިލީހަށް ކުރިމަތިލާ ޤާބިލް އަންހެން ބޭފުޅުންނަށް އެހީތެރިކަން ދިނުމަށް ގޮވާލައްވާފަ އެވެ. 

ޑރ މުއިއްޒު ވިދާޅުވީ ވިޔަފާރިވެރިން ސްޕޮންސާކޮށްދެއްވައިގެން މަޖިލީހުގެ 20 އިންސައްތަ އަންހެން ބޭފުޅުންނަށް ހޯއްދަވާދެއްވުން ވެގެންދާނީ ގައުމަށް ކޮށްދެވޭ ވަރަށް ބޮޑު ޚިދުމަތަކަށް ކަމަށެވެ. އަދި މާނަވީ ގޮތެއްގައި އެފަދައިން ކޮށްދެވޭ ކަންކަމުގެ ސަބަބުން ގައުމަށް ހަމަޖެހުން ލިބި ކަންކަމުގައި އެންމެން ޝާމިލްވެގެންދާނެ ކަމަށް ޑރ މުއިއްޒު ވިދާޅުވި އެވެ. 

މަޖިލީހަށް ކުރިމަތިލާ އަންހެނުންނަށް އެހީތެރިކަން ފޯރުކޮށްދިނުމަށް ޑރ މުއިއްޒު ވިޔަފާރިވެރިންގެ ކިބައިން އެދިވަޑައިގެންފައިވާއިރު، އެމަނިކުފާނު ވަނީ ޕީޕީއެމް-ޕީއެންސީގެ ފަރާތުން މަޖިލީހަށް ހޮވޭ އަންހެން މެމްބަރުންނަށް ޕާޓީގެ ފަރާތުން އެލަވަންސެއް ދެއްވާނެކަމަށް ވެސް ވިދާޅުވެފަ އެވެ.