ކުރިއަށް އޮތް 24 ގަޑިއިރުވެސް ރާއްޖޭގެ އެކި ހިސާބަށް ގުގުރުމާއެކު ވިއްސާރަކުރާނެ ކަމަށް މޫސުމާބެހޭ ޤައުމީ އިދާރާއިން ހާމަކޮށްފިއެވެ.

އަދި ވިއްސާރަވެ މޫސުން ގޯސްވުމުގެ ސަބަބުން އުތުރުން ފެށިގެން ގއ އަތޮޅާ ހަމައަށް ވަނީ ހުސު ސަމާލުވެސް ނެރެފައެވެ. 

މެޓް އޮފީހުން ލަފާ ކޮށްފައިވާ ގޮތުގައި, މިއަދު މެންދުރު 2:30 ވަންދެން ހއ އަތޮޅުން ފެށިގެން ގއ އަތޮޅާ ދެމެދުގެ އަތޮޅުތަކަށް ބޯކޮށް ވާރޭވެހުމާއެކު ގުގުރާނެ އެވެ. މިއަދު ހަވީރު 6:00 އާ ހަމައަށް ރާއްޖޭގެ ހުރިހާ ހިސާބަކަށް ވެސް މިއަދު ވިއްސާރަ ކުރާނެ ކަމަށް ވެސް އެ އިދާރާއިން ލަފާކުރެ އެވެ.

އެންމެ ދެކުނުގެ އަތޮޅުތަަށް ކެރީގެ އަސަރު ފޯރާނެ ކަމަށާއި, އެހެން ހިސާބުތަކަށް ގުގުރުމާއެކު ވިއްސާރަކޮށް, ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށް މެޓް އޮފީހުން ވަނީ ލަފާކޮށްފަ އެވެ. 

އެގޮތުން އުތުރާއި މެދު ރާއްޖެ ތެރޭގައި ވައި އެނބުރި، އިރުދެކުނާއި ދެކުނުން ގަޑިއަކު 3 މޭލާއި 13 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި އަދި ދެކުނުގެ އަތޮޅުތަކަށް 8 މޭލާއި 18 މޭލާއި ދެމެދުގައި ވައި ބާރުވާނެ ކަމަށް އެ އިދަރާއިން ވަނީ ބުނެފައެވެ.

މޫސުމާބެހޭ އިދާރާއިން ހާމަކުރި ގޮތުގައި ކުރިއަށް އޮތް 24 ގަޑިއިރު ރާއްޖޭގެ ހުރިހާ ހިސާބެއްގެ ކަނޑުތައް އާދައިގެ މިންވަރަކަށް މަޑުވާނެއެވެ.

އެހެން ނަމަވެސް ދެކުނުގެ ކަނޑުތައް އާދައިގެ މިންވަރަކަށް ގަދަ ވާނެ ކަމަށެވެ. އެގޮތުން އުތުރާއި މެދުރާއްޖޭގައި ރާޅު ބާނިތަކުގެ އުސްމިނުގައި 2 ފޫޓާއި 4 ފޫޓާއި ދެމެދުގެ މިންވަރެއް ހުންނާނެކަމަށާއި، ދެކުނުގައި 3 ފޫޓާއި 6 ފޫޓުގެ އުސްމިނެއް ރާޅު ބާނިތަކުގައި ހުންނާނެ ކަމަށެވެ.

މޫސުމާބެހޭ ޤައުމީ އިދާރާއިންވަނީ ބޯކޮށް ވާރޭވެހި ގުގުރާނެ ކަމަށް ލަފާކުރެވޭތީ ހުރިހާ ފަރާތްތަކުން މޫސުމަށް ސަމާލުވުމަށް އިލްތިމާސް ކޮށްފައެވެ.