ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުރބާރު ނެތްކަމުގެ މައްސަލައިގައި ސްޕްރީމް ކޯޓުގައި މިއަދު ކުރިއަށްދާ އަޑުއެހުން ފެށުމަށް ހަމަޖެހިފައިވާ ވަގުތަށްވުރެ 8 މިނެޓް ލަހުން އަޑު އެހުން ފެށުނީ ޕާޓީތަކުގެ ސަބަބުން ކަމުގައި މައްސަލައިގެ ރިޔާސަތު ބައްލަވަމުން ގެންދަވާ ފަނޑިޔާރު މަހާޒް އަލީ ޒާހިރު ވިދާޅުވެއްޖެއެވެ.

ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ އިތުރބާރުނެތްކަމަށް އެމްޑީޕީން ހުށަހަޅާއިފައިވާ މައްސަލަ މަޖިލިހުގައި ކުރިއަށް ނުގެންދެވޭތީ މަޖިލީހުގެ ގަވާއިދު މާނަކޮށްދިނުމަށް އެދި ހުށަހަޅާފައިވާ މައްސަލައިގެ އަޑުއެހުން މިއަދު ހެނދުނު 10:00 ގައި ފެށުމަށް ނިންމާފައިވީނަމަވެސް މި އަޑުއެހުން ފެށިފައިވަނީ ކަނޑައެޅިފައިވާ ވަގުތަށްވުރެ 8 މިނެޓް ލަހުންނެވެ. 

މިކަމާއި ގުޅިގެން ފަނޑިޔާރު މަހާޒް ވިދާޅުވީ، 10:00 ގައި ފެށުމަށް ހަމަޖެހިފައިވާ ޝަރީޢަތް  ފެށުމުގަ މި ދިމާވި ލަސްތަކަކީ މައްސަލައިގަ ހިމެނޭ ޕާޓީތަކުގެ ސަބަބުން ދިމާވި ލަސްވުމެއްކަމުގައެވެ. އެހެންނަމަވެސް މިކަމުގެ ސީދާ ތަފްސީލެއް އެ މަނިކުފާނު ދެއްވާފައެއް ނުވެއެވެ. 

Advertisement

މީގެ އިތުރުން ފަނޑިޔާރު މަހާޒްވަނީ، ޝަރީއަތުގެ މަޖިލިސް ބްރޭކަށް ދާ ވަގުތުތަކުގައިވެސް މައްސަލައިގައި ހިމެނޭ ޕާޓީތަކުން އެފަދަ އަމަލެއް ތަކުރާރު ނުކުރެއްވުމަށް އެދިލައްވާފައެވެ. 

މިއަދުގެ ޝަރީއަތުގެ ފުރަތަމަ ބައި 11:50 ގެ ނިޔަލަށް ކުރިއަށް ގެންދިއުމަށް ވަނީ ރާވައިފައެވެ. އެ ހިސާބަށް އަޑުއެހުންތައް ނިންމާނުލެވިއްޖެނަމަ 12:30 އިން 13:30 އަށް އަޑުއެހުންތައް ގެންދާނެކަަމަށާއި އަދި 13:30 އާއި ހަމައަށް ވެސް އަޑުއެހުން ނުނިމިއްޖެނަމަ މާދަމާވެސް އަޑުއެހުމެއް ބާއްވާނެކަމަށް މައްސަލައިގެ އިސް ފަނޑިޔާރު މަހާޒް ވިދާޅުވިއެވެ. 

މަހާޒްގެ އިތުރުން މި މައްސަލަ ބައްލަވާނީ ފަނޑިޔާރު އަލްއުސްތާޛް މަޙާޒު ޢަލީ ޒާހިރު، ފަނޑިޔާރު ޑރ. އަޒްމިރާލްދާ ޒާހިރު، ފަނޑިޔާރު އަލްއުސްތާޛް ޙުސްނުއްސުޢޫދު، ފަނޑިޔާރު އަލްއުސްތާޛް ޢަލީ ރަޝީދު ޙުސައިން، ފަނޑިޔާރު ޑރ. މުޙައްމަދު އިބްރާހީމް އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލައިން  ޕީޕީއެމް، ޕީއެންސީ އަދި ދަ ޑިމޮކްރެޓްސް އިން ވަނީ ތަދައްހުލްވެފައެވެ.