ފަލަސްތީގެ ގައްޒާއަށް ނިއުކުލިއާ ބޮމެއް އަޅަންޖެހޭކަމަށް އިޒްރޭލުގެ ނިރުބަވެރި ހެރިޓޭޖް މިނިސްޓަރު ބުނި ބުނުން ދިވެހި ސަރުކާރުން ކުށްވެރިކޮށްފިއެވެ.

ހައްދުފަހަނައަޅާފައިވާ އިސްރާއީލުގެ ސިފައިން ފަލަސްތީނަށް ދެމުން ގެންދާ ޢުދުވާނީ ހަމަލާތައް ވަރުގަދަކޮށް ޣައްޒާއަށް ނިޔުކުލިއާރ ބޮން އަޅަން އިޒްރޭލުގެ ނިރުބަވެރި މިނިސްޓަރު ބުނުމާއި ގުޅިގެން ފޮރިން މިނިސްޓްރީން ނެރުނު ބަޔާނެއްގައި ބުނީ، އިސްރާއީލުން ގަދަކަމުން ފޭރިގެންފައިވާ ޣައްޒާގެ ސަރަހައްދުގައި ނިއުކްލިއާ ބޮމެއް ބޭނުންކުރުމަކީ އޮޕްޝަނެއް ކަމަށް ބުނިބުނުން ރާއްޖޭގެ ސަރުކާރުން ވަރަށް ބޮޑަށް ކުށްވެރިކުރާކަމަށެވެ. 

"ބައިނަލްއަގްވާމީ އިންސާނީ ގާނޫނުތަކާ ފާޅުކަން ބޮޑު ގޮތެއްގައި ހިލާފުވުން ތަމްސީލުކުރާ ބަޔާނަކަށް އިސްރާއީލު ސަރުކާރުން އެކަށީގެންވާ ތަރުހީބެއް ނުލިބުމާ މެދު ވެސް ދިވެހި ސަރުކާރުން ފުންކޮށް ކަންބޮޑުވުން ފާޅުކޮށް، ފަލަސްތީނުގެ މީހުންގެ ފުރާނައަށް ނުރައްކާވާ މިފަދަ ވާހަކަތަކާ މެދު ފިޔަވަޅުއެޅުމަށް ބައިނަލްއަގްވާމީ މުޖުތަމައަށް ގޮވާލަން،" ފޮރިން މިނިސްޓްރީން މިއަދު ނެރުނު ބަޔާނުގައި ބުންޏެވެ. 

މިއާއެކު އެބަޔާނުގައި ވަނީ، ފަލަސްތީނުގެ ކުށެއްނެތް އާންމުންނަށް ދޭ ހަމަލާތައް ހުއްޓުވުމަށް ބައިނަލްއަގްވާމީ މުޖުތަމައުއިން އަވަސް ފިޔަވަޅު އެޅުމަށް ތަކުރާރުކޮށް ގޮވާލާފައެވެ. އަދި ފަލަސްތީނުގެ ރައްޔިތުންނަށް ހުރަހެއް ނެތި އިންސާނީ އެހީ ފޯރުކޮށްދިނުމަށް ފުރުސަތު ދިނުމަށާއި ހަރުދަނާ ކުރުމަށް ވަގުތުން ހަނގުރާމަ ހުއްޓާލުމަށް ގޮވާލާކަމަށް ވެސް އެ ބަޔާނުގައި ވަނީ ބުނެފައެވެ. 

މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން ދެމުން ޒަޔަނިސްޓް ޔަހޫދީން ފަލަސްތީނަށް ދެމުންދާ ހަމަލާ ތަކުގައި 9200 އަށްވުރެ ގިނަ މީހުން ވަނީ ޝަހީދުވެފައެވެ. އަދި އެ ހަމަލާތަކާއި ގުޅިގެން ޣައްޒާގައި 2.2 މީހުން ހާލުގައި ޖެހިފައިވާއިރު، އެ ސިޓީން ކަރަންޓު ފެން، ބޭސް އަދި ކާބޯތަކެތި ލިބުން ވަނީ ހުއްޓުމަކަށް އައިސްފައެވެ.