ނޭޝަނަލް ކައުންޓަރ ޓެރަރިޒަމް ސެންޓަރ، އެންސީޓީސީ އަކީ ލާދީނީ ފިކުރު ފަތުރަން މަސައްކަތް ކުރާ ތަނެއް ކަމަށް ދީނީ ޢިލްމުވެރިޔާ އައްޝެއިޚު އާދަމް ނިޝާން ވިދާޅުވެއްޖެއެވެ. 

ނިޝާން މިފަދައިން ވިދާޅުވެފައި ވަނީ ނިރުބަވެރި ޔަހޫދީންނާއި ފަލަސްޠީނުގެ މިނިވަންކަމަށް ޖިހާދުކުރާ ހަމާސް ޖަމާޢަތާ ދެމެދު، އޮކްޓޫބަރު މަހުގެ 7 ން ފެށިގެން ކުރަމުން އަންނަ ހަނގުރާމައިގައި ބައިވެރި ވާން ދިވެހީންތަކެއް ދިޔަ ކަމަށް ބުނާ ވާހަކައިގެ ޙަޤީޤަތް ބަލަން ފަށާފައިވާ ކަމަށް އެންސީޓީސީގެ ޑައިރެކްޓަ ޖެނެރަލް ޒަކަރިއްޔާ މަންސޫރު ވިދާޅުވުމާއި ގުޅިގެން ފޭސްބުކުގައި ލިޔުއްވި ޕޯސްޓެއްގައެވެ. 

އެގޮތުން ނިޝާން ވިދާޅުވީ، ދިވެހި ރައްޔިތުން ފުރަތަމަ ކުރަންވީ ކަމަކީ މިޤައުމުގައި ތިބަ ދިވެހި ޔަހޫދީ ޒަޔަނިސްޓު ބައިގަނޑު "މައިތިރި" ކުރުން ކަމަށެވެ. އެހެނީ އިސްލާމްދީނުގައި ޝަރުޢުވެފައިވާ މަތިވެރި ޖިހާދަކީ ޓެރަރިޒަމްކަމަށް އެ ބުނަމުން ކަމަށް ނިޝާން ވިދާޅުވިއެވެ. 

މިއާއެކު ނިޝާން ވަނީ އެންސީޓީސީ އަކީ ހުޅަނގާއި ޔަހޫދީން ބޭނުންވާ ގޮތަށް، އެމީހުން އިސްލާމްދީނާއި މުސްލިމުންނާއި ދެކޮޅަށް ހިންގާ ލާއިންސާނީ ޖަރީމާތައް ޒީނަތްތެރިކޮށް، އިސްލާމީ ޝަރީޢަތާއި އިސްލާމީ ޖިހާދަކީ ޓެރަރިޒަމް ކަމަށް ކަނޑައަޅައި، އެމްޑީއެންގެ ލާދީނީ ފިކުރު ފެތުރުމަށް މަސައްކަތްކުރާ ބައިގަނޑެއްގެ ގޮތަށް ސިފަ ކުރައްވާފައެވެ. 

ނިޝާން ވިދާޅުވީ، ފާއިތުވެ ދިޔަ ތަނުގައި އެންސީޓީސީން "ޓެރަރިޒަމް އޭ ކިޔައިގެން ހުޅަނގުން ޖެހިހާ ބެރަކަށް ނަށަމުން، މުސްލިމުން ވާ ވައްދަން ކުރި މަސައްކަތް ދެން ކާމިޔާބެއް" ނުވާނެ ކަމަށެވެ. އަދި ހުޅަނގުން ޓެރަރިޒަމް މާނަ ކުރާ ގޮތަކީ ކޮބައިކަން މިއަދު މުޅި ދުނިޔެއަށްވެސް ހާމަވެ އެނގިފާޅުވެފައިވާ ކަމަށް އޭނާ ވިދާޅުވި އެވެ. 

ނިޝާން އިތުރަށް ވިދާޅުވީ ލާދީނީ މީހުން ރުޅިއައި ކަމުގައި ވީނަމަވެސް، ކީރިތި ޤުރްއާން މިބިންމަތީގައި އޮތްހައި ހިނދަކު، މާތް اللهގެ މަގުގައި ކުރާ ޖިހާދުގެ އަޑު ކަނޑުވައެއް ނުލެވޭނެ ކަމަށެވެ.

"الله ތަޢާލާ ވަޙީކުރައްވާފައިވެއެވެ.

{فَقَٰتِلۡ فِي سَبِيلِ ٱللَّهِ لَا تُكَلَّفُ إِلَّا نَفۡسَكَۚ وَحَرِّضِ ٱلۡمُؤۡمِنِينَۖ عَسَى ٱللَّهُ أَن يَكُفَّ بَأۡسَ ٱلَّذِينَ كَفَرُواْۚ وَٱللَّهُ أَشَدُّ بَأۡسٗا وَأَشَدُّ تَنكِيلٗا} [سُورَةُ النِّسَاءِ: ٨٤]

"ފަހެ، اللهގެ މަގުގައި ކަލޭގެފާނު ހަނގުރާމަ ކުރައްވާށެވެ! ކަލޭގެފާނުންގެ އަމިއްލަ ނަފްސަށް މެނުވީ ކަލޭގެފާނަކަށް ތަކްލީފެއް ނުޖައްސަވާހުށްޓެވެ. އަދި ހަނގުރާމަކުރުމަށް މުއުމިނުންނަށް ކަލޭގެފާނު ހިތްވަރު ދެއްވާށެވެ! ކާފަރުވި މީހުންގެ ބާރު، الله ނެތިކުރެއްވުން ގާތެވެ. އަދި، ބާރުވެރިކަމުގެ ގޮތުން الله ގަދަފަދަ ވަންތަކަން ބޮޑެވެ. އަދި، ޢަޛާބު ދެއްވުމުގައިވެސް ގަދަފަދަވަންތަކަން ބޮޑުމެއެވެ."" ނިޝާންގެ ޕޯސްޓުގައި ވިދާޅުވި އެވެ. 

އޮކްޓޫބަރު 7 ވަނަ ދުވަހު ހަމާސްގެ މުޖާހިދުން ދިން ހަމަލާތަކިގެ ރައްދެއްގެ ގޮތުގައި ހައްދުފަހަނައަޅާފައިވާ އިސްރާއީލުން ދޭން ފެށި ހަމަލާތައް އަދިވެސް އެމީހުން ހުއްޓައިނުލައެވެ. މިހަމަލާތަކުގައި 10،000 ވުރެ ގިނަ މީހުން ޝަހީދުވެފައިވާއިރު އޭގެ ތެރެއިން 4،104 ޝަހީދުންނަކީ ކުޑަކުދިންނެވެ. 2641 ޝަހީދުންނަކީ އަންހެނުންނެވެ.