ދިވެހިރާއްޖޭގެ ކަނޑުގެ ސަރަހައްދުގައި ގަވާއިދާ ހިލާފަށް މަސްވެރިކަން ކުރަމުންދަނިކޮށް މިމަހުގެ 23 ވަނަ ދުވަހު ރާއްޖޭން ހައްޔަރުކުރި އިންޑިއާގެ ޓެމިލް ނާޑޫއަށް ނިސްބަތްވާ މަސްވެރިންތަކެއް ދޫކޮށްލުމަށް އެ ސްޓޭޓްގެ ޗީފް މިނިސްޓަރު އެމްކޭ ސްޓާލިން ގޮވާލައިފިއެވެ.
ރާއްޖޭގެ ކަނޑުގެ ސަރަހައްދުން ގަވާއިދާއި ޚިލާފަށް މަސްވެރިކަން ކުރަމުން ދަނިކޮށް ހިފެހެއްޓި މި އުޅަނދުން ހައްޔަރުކޮށްފައިވަނީ 12 މަސްވެރިއެކެވެ. މި ކަމާއިގުޅިގެން ޓެމިލް ނާޑޫގެ ޗީފް މިނިސްޓަރު އެމްކޭސްޓާލިން ބުނީ މިދިޔަ މަހު ފުރަތަމަ ދުވަހު މަހަށް ފުރި އެ ބޯޓުން މަސްވެރިކަން ކުރަމުން ދިޔައީ ގަވާއިދާ އެއްގޮތަށް ކަމަށާއި އެ އުޅަނދުން ރާއްޖޭގެ ބޯޑަރު ތެރެއަށް ނުވަންނަ ކަމަށެވެ.
ރާއްޖޭގެ ސިފައިން އެ މީހުން ހައްޔަރުކުރީ ރާއްޖޭގެ ސަރަހައްދަށް ނުވަދެ މައި ކަނޑުގައި މަސްވެރިކަން ކުރަމުން ދަނިކޮށް
ސްޓާލިން
ޓެމިލްނާޑޫއަށް ނިސްބަތްވާ މި މަސްވެރިން ހައްޔަރުކުރި މައްސަލައިގައި މީގެ ކުރިންވެސް ސްޓާލިން ވަނީ އެ މީހުން މިނިވަންކުރުމަށްޓަކައި އިންޑިއާގެ އެކްސްޓާނަލް މިނިސްޓަރު ޑރ. އެސް ޖައިޝަންކަރަށްވެސް މައްސަލަ ހުށަހަޅުއްވައިގެން އެ މަސައްކަތް ކުރިއަށް ގެންދަވާފައެވެ.
އެ މަސައްކަތުގެ ދަށުން ޖައިޝަންކަރަށް ސްޓާލިން ފޮނުވި ސިޓީއެއްގައި ވަނީ، އެ މަސައްކަތުގައި އެކްސްޓާނަލް މިނިސްޓަރު އެހީތެރިވެ ވަޑައިގެންފި ކަމުގައި ވާނަމަ އެ މަސްވެރިން މިނިވަން ވާނެ ކަމަށް ގަބޫލުކުރައްވާކަމަށް ލިޔުއްވާފައެވެ.
އެ ސިޓީގައި ބުނެފައިވާ ގޮތުގައި ރާއްޖޭން އެ މަސްވެރިންގެ މައްޗަށް 420،000 ދިވެހި ރުފިޔާގެ ޖޫރިމަނާއެއް އިއްވާ މި މަހުގެ ނިޔަލަށް އެ ފައިސާ ދައްކަން އަންގައިފައިވާކަމާއި އަދި އެ ފައިސާ ނުދައްކާނަމަ މަސް ބޯޓު އަދި މަސްވެރިން ދޫކޮށްނުލާނެ ކަމަށް އަންގާފައިވާ ކަމަށެވެ.
ދިވެހިރާއްޖޭގެ ކަނޑުގެ ސަރަހައްދަށް ވަދެ ގަވާއިދާއި ޚިލާފަށް މަސްވެރިކަން ކުރަމުން ދަނިކޮށް އެކި ފަހަރުމަތިން މީގެ ކުރިންވެސް ވަނީ އެކި ގައުމުތަކަށް ނިސްބަތްވާ މަސްބޯޓުތައް ހިފަހައްޓައިފައެވެ.
Advertisement
This content is created and paid for by advertisers and does not involve Voice Journalists
