ދިވެހިރާއްޖޭހގެ ކަނޑުގެ ސަރަހައްދުގައި ޤަވާއިދާއި ޚިލާފަށް މަސްވެރިކަން ކުރަމުން ދަނިކޮށް މިދިޔަ މަހުގެ 22 ވަނަ ދުވަހު ހައްޔަރުކުރި އިންޑިޔާގެ 12 މަސްވެރިން މިނިވަންކޮށް އަނބުރަ އެ ޤައުމަށް ފޮނުވުމުގެ މަސައްކަތް ބާރު ދުވެލީގައި ކުރަމުން އަންނަ ކަމުގައި ދިވެހިރާއްޖޭގައި ހުންނަ އިންޑިޔާގެ ހައި ކޮމިޝަނުން ބުނެފިއެވެ. 

ދިވެހިރާއްޖެއިން ހައްޔަރުކޮށްފައިވާ މި 12 މަސްވެރިންނާއު ގުޅޭ ފަހުގެ އަދާހަމަތައް ހިއްސާކުރަމުން އެ ކޮމިޝަނުން ކޮށްފައިފައިވާ ޓުވީޓެެއްގައި ބުނެފައިވަނީ، ދިވެހިރާއްޖޭގެ ކަނޑުގެ ސަރަހައްދުން ގަވާއިދާ ޚިލާފަށް ހައްޔަރުކޮށްފައިވާ މަސްވެރިންނާއި އެފަރާތްތަކުގެ އާއިލާތަކަށް ބޭނުންވާ ކަންކަން އެންމެ ގާތުން ބަލަމުން އަންނަ ކަމަށާއި އެ މަސްވެރިން މިނިވަންކޮށް އަނބުރާ އިންޑިޔާއަށް ފޮނުވުމުގެ މަސައްކަތްތައް ނުހަނު ގާތުން ބަލައި އެކަން އެ ކޮމިޝަނުން ކުރަމުން އަންނަ ކަމުގައެވެ. 

އަދި މި މަސްވެރިން ދޫކޮށްލުމާއި ގުޅުންހުރި ކަންކަމުގައި ދިވެހިރާއްޖޭގެ ކަމާބެހޭ ފަރަތްތަކާއެކު މަސައްކަތް ކުރަމުން އަންނަ ކަމުގައިވެސް އިންޑިއަން ހައި ކޮމިޝަންގެ ޓުވީޓުގައި ވެއެވެ. 

ރާއްޖޭގެ ކަނޑުގެ ސަރަހައްދުން ގަވާއިދާއި ޚިލާފަށް މަސްވެރިކަން ކުރަނިކޮށް ހައްޔަރުކުރި ބޯޓުގައި ތިބި 12 ފަޅުވެރިން ނިސްބަތްވާ އިންޑިޔާގެ ޓަމިލްނާޓޫގެ ޝީފް މިނިސްޓަރ އެމްކޭ ސްޓާލިންވެސް އެވަނީ އެ ފަރާތްތައް ދޫކޮށްލުމަށް ދިވެހިރާއްޖެއަށް ގޮވާލައިފައެވެ. 

އެގޮތުން ސްޓާލިން ބުނެފައިވަނީ ހައްޔަރުކުރި ބޯޓު މަސްވެރިކަން ކުރަމުން އައީ ގަވާއިދާއި އެއްގޮތަށް ކަމަށާއި އެ ބޯޓު ދިވެހިރާއްޖޭގެ ބޯޑަރު ސަރަހައްދަށް ނުވަންނަ ކަމަށެވެ.