ފަލަސްތީނާ ދެކޮޅަށް ނިރުބަވެރި އިޒްރޭލުން ކުރަމުންދާ ހަނގުރާމަ ތިން ދުވަހަށް މެދުކަނޑާލަން އިޒްރޭލުގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫގެ ކިބައިން އެމެރިކާގެ ރައީސް ޖޯ ބައިޑެން އެދިއްޖެއެވެ.
އެމެރިކާ އަދި އިޒްރޭލުގެ އޮފިޝަލުންތަކަކާ ހަވާލާދީ އެމެރިކާގެ މަޝްހޫރު ނޫހެއް ކަމަށްވާ "އެކްސިއޮސް" އިން ރިޕޯޓް ކޮށްފައިވާ ގޮތުން ބައިޑެން ނަތަންޔާހޫގެ ކިބައިން އެފަދައިން އެދުނީ މިހަފްތާގެ ހޯމަ ދުވަހު، ނަތަންޔާހޫ އާ ފޯނުން ގުޅައިގެން ވާހަކަ ދައްކަމުންނެވެ.
ފަލަސްޠީނުގެ ރައްޔިތުން މެރުމަށް ހަތިޔާރުވެސް ފޯރުކޮށްދެމުންދާ ބައިޑެން، ތިން ދުވަހަށް ހަނގުރާމަ މެދުކަނޑާލަން އެދިފައިވަނީ ހަމާސް ޖަމާއަތުގެ ބެލުމުގެ ދަށުގައި ތިބި އިސްރައީލްގެ އަސީރުން ސަލާމަތް ކުރުމުގެ ބޭނުމުގައި ކަމަށް އެމެރިކާގެ އެ ނޫހުން ބުނެފައިވެ އެވެ.
"އެކްސިއޮސް" އިން ބުނެފައިވާ ގޮތުގައި ހަނގުރާމަ މެދުކަނޑާލަން އެ ދެވޭ ތިން ދުވަހުގެ ތެރޭގައި ހަމާސްގެ ބެލުމުގެ ދަށުގައި ތިބި މީހުންގެ ތެރެއިން 15-10 މީހުން އެ ޖަމާއަތުން ދޫކުރުމާ ގުޅޭގޮތުން އެމެރިކާ އާއި އިޒްރޭލު އަދި ގަތަރުން އަންނަނީ މަޝްވަރާ ކުރަމުންނެވެ.
އަދި އެ މުއްދަތުގެ ތެރޭގައި އެ ދޫކުރެވޭ މީހުންގެ ވަނަވަރާއި، ހަމާސްގެ ބެލުމުގެ ދަށުގައި ހުރި މީހުންގެ ލިސްޓުވެސް އިޒްރޭލަށް އެންގުމަށް އެ ތިން ގައުމުގެ ދެމެދުގައި މަޝްވަރާ ކުރެވިފައިވާ ކަމަށް އެމެރިކާގެ އެ ނޫހުގައިވެއެވެ.
ނަމަވެސް ހަމާސް ޖަމާއަތަށް އިތުބާރު ނުކުރާ ކަމަށާއި އަދި މީހުން ދޫކުރަން ހަމާސް އިން އެއްބަސްވާން ތައްޔާރަށް ތިބި ކަމަށް ގަބޫލުނުކުރާ ކަމަށް ނަތަންޔާހޫ ބައިޑެންގެ ގާތު ބުނެފައިވާ ކަމަށްވެސް އެ ނޫހުގައި ވެއެވެ.
އެމެރިކާގެ އެ ނޫހުން ހަނގުރާމަ މެދުކަނޑާލަން ބައިޑެން ބުނި ކަމަށް ރިޕޯޓް ކޮށްފައިވާއިރު، ބައިޑެން ވެސް ވަނީ އެ މެދު ކަނޑާލުމަކީ ހަމާސްގެ ބެލުމުގެ ދަށުގައި ތިބި ހައްޔަރީން ސަލާމަތް ކުރުމަށް ދެވޭ ފުރުސަތެއް ކަމަށް ބުނެފައެވެ.
އެމެރިކާއިން އެހެން އެދުނު ނަމަވެސް، އިޒްރޭލުގެ ގަތުލު ޢާއްމު ހުއްޓާލައި ފަލަސްތީނުގެ ގާޒާ އަށް ތެޔޮ އެތެރެކުރަން ހުއްދަ ދޭނީ ވެސް ހަމާސްގެ ބެލުމުގެ ދަށުގައި ތިބި އެންމެން ދޫކޮށްލުމުން ކަމަށް ނިރުބަވެރި ނަތަންޔާހޫ ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
