އިޒްރާއިލް ޕާސްޕޯޓް ބޭން ކުރުމަށް ގޮވަލައި ރައްޔިތުންގެ މަޖިލިސް ކުރާ ގޭ ކުރިމަތީގައި މުޒާހަރާ ކުރަން ފަށައިފިއެވެ.

މެންދުރުން ފެށިގެން ކުރަމުންދާ މިމުޒާހަރާގައި ބައިވެރިވި މީހުން ގޮވައިލައިފައިވަނީ އިޒްރާއިލްގެ ޕާސްޕޯޓް އޮންނަ މީހުން ރާއްޖެއަށް އެތެރެ ނުވެވޭ ގޮތް ހެދުމަށެެވެ. އެގޮތުން ކުއްލި މައްސަލައެއްގެެ ގޮތުގައި އިޒްރާއިލްގެ ޕާސްޕޯޓް ބޭން ކުރުން މަޖިލީހަށް ވައްދައި ޤަރާރު ފާސްކޮށްދިނުމަށް އެމީހުން ދަނީ ގޮވާލަމުންނެވެ 

މަޖިލިސް ކުރާ ގޭގެ ބޭރަށް އެއްވި އާންމު ރައްޔިތުންނާއި މަޖިލީހުގެ ބައެއް މެމްބަރުން ވަނީ ވާހަކަ ދައްކަވައިފައެެވެ.

ރޭވެސް މާލޭ ރަސްފަންނު ސަރަހައްދުން ފެށިގެން ހެންވޭރު ހެދިގޮނޑު ދޮށާއި ހަމައަށް ވަނީ އިޒްރާއިލުން ފަލަސްޠީނުގެ ޣައްޒާގައި ހިންގަމުންދާ އަނިޔާވެރި ޖަރީމާތައް ހުއްޓައިލުމަށް ގޮވައިލައި ހިނގާލުމެއް ބާއްވައިފައެވެ.

އިޒްރާއިލުން އޮކްޓޫބަރު 7ވަނަ ދުވަހު ޣައްޒާއަށް ދޭން ފެށި ހަމަލާތަކުގައި 11،200 އަށް ވުރެ ގިނަ މީހުން ޝަހީދު ވެފައިވާ ކަން ފަަލަސްޠީނުގެ ހެލްތް މިނިސްޓްރީ އިން އެންމެ ފަހުން ނެރުނު އަދާހަމަތަކުން އެނގެއެވެ.

ނަމަވެސް މިހާރު ޝަހީދު ވަމުންދާ އަދި ޒަޚަމްވަމުންދާ މީހުންގެ ޢަދަދު ދެނެގަތުމަށް ދަތިވެފައިވާ ކަމަށްވެސް ފަަލަސްޠީނުގެ ހެލްތް މިނިސްޓްރީ އިން މިހާރުވަނީ ބުނެފައެވެ.