މިއަދު ފެށިގެންދާ އައު ރިޔާސީ ދައުރުގެ ސިޔާސަތަކަށް ވާނީ، ވަޒަން ހަމަކޮށް، މިގައުމުގެ ފަސްގަނޑާއި އަދި މި ގައުމުގެ ރައްޔިތުންގެ ސިކުނޑިތައް ބިނާކުރުމުގެ މަސައްކަތް ކުރުން ކަމަށް ދިވެހި ޖުމްހޫރިއްޔާގެ 8 ވަނަ ރައީސުލްޖުމްހޫރިއްޔާ، ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސް ޑރ. މުޢިއްޒު، ރައީސުލްޖުމްހޫރިއްޔާ ކަމުގެ ހުވާ ކުރެއްވުމަށް ޖުމްހޫރީ މައިދާނުގައި މިއަދު ބޭއްވި ރަސްމިއްޔާތުގައި ވާހަކަދައްކަވަމުން އެމަނިކުފާނު ވިދާޅުވީ، މިއަދަކީ ދިވެހީންގެރާއްޖެއަށް އަލުން އެނބުރި ދިޔުމުގެ ޚާއްސަ ދަތުރަށް ރިޔާ ކޮށާލެވުނު ދުވަސް ކަމަށެވެ. އަދި މިއީ ދިވެހިންގެ އުއްމީދުތައް ހާސިލްކޮށްދީ، ކަންބޮޑުވުންތައް ހައްލު ކޮށްދިނުމުގެ ވިންދު ޖަހަމުންދާ ވަގުތުކަމަށްވެސް އެމަނިކުފާނު ވިދާޅުވި އެވެ.
މިއާއެކު ރައީސް މުއިއްޒު ވިދާޅުވީ، ދައުލަތެއްގެ ސަލާމަތާއި، ދުނިޔޭގައި، އެބައެއްގެ އާރާއި ބާރާއި، ގަދަރާއި އިހްތިރާމް ނެގެހެއްޓުމަށްޓަކައި މައިގަނޑު ދެ ބިނާ ކުރުމެއް ބިނާ ކުރެވޭ ކަމަށެވެ.
"އެއީ، ޢުމްރާނީ ބިނާކުރުމާއި އިންސާނީ ބިނާކުރުން. ނުވަތަ އެހެން ޢިބާރާތަކުން ދަންނަވާނަމަ، ގެދޮރާއި، ދިފާޢީ ބުރުޒުތަކާއި، މަގުތަކާއި، ފާލަންތަކާއި، އޮފީސްތައް ބިނާކުރުމާއި، ހެޔޮވިސްނުން ހުރި ސިކުނޑިތަކެއް ލިބިފައިވާ، އަޚްލާޤު ރަނގަޅު މުޖުތަމަޢެއް ބިނާކުރުން. އެހެންކަމުން، އެއީ ޤައުމުގެ ފަސްގަނޑު ބިނާކުރުމާއި، ޤައުމުގެ ސިކުނޑިތައް ބިނާކުރުން."
ރައީސް ޑރ. މުހައްމަދު މުޢިއްޒު
ރައީސް ޑރ. މުޢިއްޒު ވިދާޅުވީ އެމަނިކުފާނުގެ ރިޔާސީ ދައުރުގެ ސިޔާސަތަކަށް ވާނީ، އެ ދެ ބާވަތުގެ ބިނާކުރުން ވަޒަން ހަމަކޮށް ކުރިއަށް ގެންދިޔުން ކަމަށެވެ.
މި ފެށުނު ރިޔާސީ ދައުރުގެ ސިޔާސަތަކަށް ވާނީ، މި ދެ ބާވަތުގެ ބިނާކުރުން ވަޒަން ހަމަކޮށް ކުރިއަށް ގެންދިޔުން. ޢިލްމާއި ހުނަރު. އަޚްލާޤާއި ދީން. އުޅުންތެރިކަމާއި މަސައްކަތްތެރިކަން. މިކަންކަން ދިވެހި ދަރީންގެ ކިބައިގައި އަށަގެންނެވުން. ހަމައެހެންމެ، ރާއްޖޭގެ ބިނާވެށްޓަށް އާދަޔާ ޚިލާފު އިންޤިލާބީ މުއްސަނދިކަމެއް ގެނައުން. އަޅުގަނޑު އެކުލަވައިލާ ސަރުކާރު ކުރިއަށްދާނީ، އިރާދަކުރެއްވިއްޔާ މި ދެ އަސާސުގެ މަތީގައި.
ރައީސް ޑރ. މުހައްމަދު މުޢިއްޒު
ރައީސުލްޖުމްހޫރިއްޔާ، އިތުރަށް ވިދާޅުވީ ރާއްޖޭގެ ބާރުތަކުގެ މިނިވަންކަން ކަށަވަރުކުރައްވަން ބޭނުންފުޅުވެ ވަޑައިގަންނަވާ ކަމަށާއި ސަރުކާރު ފެށުމާއެކު ޚާއްޞަކޮށް ޝަރުޢީ ދާއިރާއަށް ސަރުކާރުން ނުފޫޒުފޯރުވުން ނިމުމަކަށް އަންނާނެކަމަށެވެ.
Advertisement
This content is created and paid for by advertisers and does not involve Voice Journalists
