ރައީސުލްޖުމްހޫރިއްޔާ ކަމުގެ ހުވާ ކުރެއްވުމުގެ ރަސްމިއްޔާތު ނިންމަވާ ލެއްވުމަށްފަހު، އައު ރިޔާސީ ދައުރަށް އިންތިޚާބު ކުރެވުނު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު، މިސްކިތަށް ވަޑައިގެންފި އެވެ.
ރައީސުލްޖުމްހޫރިއްޔާ ޑރ. މުޢިއްޒު، މަގާމުގެ ހުވާ ކުރެއްވުމުގެ ރަސްމިއްޔާތު އޮތީ މިއަދު ހަވީރު 4:30 ގައި ޖުމްހޫރީ މައިދާނުގައެވެ.
އެ ރަސްމިއްޔާތު ނިމުނު ވަގުތާއި މަޣުރިބު ނަމާދުގެ ވަގުތުވީ ގާތްގަނޑަކަށް އެއްވަގުތެއް ކަމުން، ރަސްމިއްޔާތަށްފަހު، ރައީސް މުޢިއްޒާއި، ނާއިބު ރައީސް ހުސައިން މުހައްމަދު ލަތީފް އަދި އައު ސަރުކާރުގައި ހިމެނިވަޑައިގަންނަވާ ބައެއް ބޭފުޅުން ވަޑައިގެންނެވީ ކައިރީގައި ހުރި އިސްލާމީ މަރުކަޒަށް މަޣުރިބު ނަމާދަށެވެ.
އިސްލާމީ މަރުކަޒުގައި އިމާމުވެ ނަމާދު ކުރެއްވީ މި ސަރުކާރުގެ އިސްލާމިކް މިނިސްޓަރުގެ މަގާމަށް އައްޔަންކުރައްވާނެ ކަމަށް ބެލެވޭ ކުރީގެ އިސްލާމިކް މިނިސްޓަރު ޑރ. ޝަހީމް ޢަލީ ސަޢީދެވެ.
ހުވާކުރެއްވުމުގެ ރަސްމިއްޔާތަށްފަހު، މަޣުރިބު ނަމާދުގެ ޖަމާޢަތަށް ރައީސް މުޢިއްޒު ވަޑައިގެންފައިވާއިރު، އެމާނިކުފާނުގެ ފަރާތްޕުޅުން ފެނިވަޑައިގެންނެވި މި ޢަމަލަށް ގިނަބައެއް ވަނީ ތަޢުރީފް ކުރައްވާފައެވެ.
ރިޔާސީ އިންތިހާބުގެ ކެންޕެއިން ތެރެއިންނާއި އޭގެ ފަހުންވެސް ރައީސުލްޖުމްހޫރިއްޔާ މުޢިއްޒު ނަމާދަށް ފަރުވާތެރިވެވަޑައިގަންނަވާ ކަމަށްޓަކައި ގިނަ ބައެއްގެ އަދި ޢިލްމުވެރިންގެވެސް ލޯބި ވަނީ އެމަނިކުފާނަށް ލިބިވަޑައިގެންފައިއެވެ.
Advertisement
This content is created and paid for by advertisers and does not involve Voice Journalists
