ރައީސް ޑރ މުޙައްމަދު މުޢިއްޒު ސްރީލަންކާއަށް ވަޑައިގަތުމަށް އެޤައުމުގެ ރައީސް ރަނިލް ވިކްރަމަސިންހާ ދައުވަތު ދެއްވައިފިއެވެ.

ސްރީލަންކާގެ ރައީސް ރަނިލް ރައީސް ޑރ މުޢިއްޒަށް ސްރީލަންކާއަށް ވަޑައިގަތުމަށް ދަޢުވަތު ދެއްވެވީ ރޭ، ކުރުނބާ މޯލްޑިވްސްގައި އެދެބޭފުޅުން އެކުގައި ބޭއްވެވި ބައްދަލުކުރެއްވުމުގަ އެވެ.

ސްރީލަންކާގެ ރައީސް ރަނިލް، ރާއްޖޭގެ ރައީސް ޑރ މުޢިއްޒަށް ދައުވަތު ދެއްވެވީ އެމަނިކުފާނަށް ފަސޭހަފުޅު ވަގުތެއްގައި ސްރީލަންކާއަށް ވަޑައިގަތުމަށެވެ.

Advertisement

މި ބައްދަލުކުރެއްވުމުގައި ރައީސް ޑރ މުޢިއްޒުވަނީ އެމަނިކުފާނު ދިވެހިރާއްޖޭގެ ރައީސުލްޖުމްހޫރިއްޔާ ކަމުގެ ޤާނޫނީ ހުވައި ކުރެއްވުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް ސްރީލަންކާގެ ރައީސް ރާއްޖެއަށް ވަޑައިގެންނެވުމުން އެކަން ޝުކުރުވެރިކަމާއެކު ފާހަގަކުރައްވާފައެވެ.

އަދި ސްރީލަންކާގެ ރައީސް ރާއްޖެއަށް ވަޑައިގެންނެވުމަކީ ދެ ޤައުމުގެ ގާތްގުޅުން ދައްކުވައިދޭ ކަމެއްކަން ރައީސް ޑރ މުޢިއްޒު ވިދާޅުވިއެވެ.

ސްރީލަންކާގެ ރައީސް ވަނީ ރައީސް ޑރމުޢިއްޒު ރާއްޖޭގެ ރައީސް ކަމުގެ މަޤާމާއި ހަވާލުވެވެވަޑައިގެންނެވުމާއި ގުޅިގެން އެމަނިކުފާނަށް މަރުޙަބާ ވިދާޅުވެފައެވެ.

މި ބައްދަލުކުރެއްވުމުގައި ދެ ބޭފުޅުން ވަނީ ދެޤައުމުގެ ދެމެދު އޮންނަ ޒަމާންވީ ގާތް ރަހުމަތްތެރި ގުޅުމުގެ މައްޗަށް އަލިއަޅުވާލައްވައި، މިގުޅުން ކުރިމަގުގައި އިތުރަށް ބަދަހިކުރެއްވުމާ ގުޅޭގޮތުން ވާހަކަފުޅު ދައްކަވާފައެވެ.

މިގޮތުން ދެބޭފުޅުން ވަނީ ތަޢުލީމީ ދާއިރާއާ ގުޅޭގޮތުންނާއި އަށާރައަރުން ދަށުގެ ކިޔަވާކުދިންނަށް ވިސާ ލިބުމުގައި ލުއިފަސޭހަގޮތްތައް ހަމަޖެއްސުމާ ގުޅޭގޮތުންނާއި އިޤްތިޞާދު އާރާސްތުކުރުމަށް ކުރެވޭ މަސައްކަތްތައް ހިމެނޭހެން ދެގައުމުން އިސްކަންދޭ މުހިންމު ކަންކަމާއި ގުޅޭގޮތުން މަޝްވަރާކުރައްވާފައެވެ.