ރައީސުލްޖުމްހޫރިއްޔާ ޑރ މުހައްމަދު މުއިއްޒު ރިޔާސީ ކެމްޕޭނުގައި ދެއްކެވި ވާހަކަފުޅުތަކާއި، ވެލެއްވި ވައުދުފުތުތައް އެކުލަވާލާ ފޮތެއް ޝާއިއުކުރެއްވުމަކީ އެމަނިކުފާނު ރައްޔިތުންނަށް ވެލެއްވި ވައުދުފުޅުތަކަށް ފުރަގަސް ނުދެއްވާނެކަމުގެ ދަލީލެއް ކަމަށް ފިޝަރީސް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެރިކަމުގެ ޤާނޫނީ ހުވާ ކުރެއްވުމާއި ގުޅިގެން އެމަނިކުފާނަށް މަރުހަބާ ދަންނަވާ އެސްގައި ކޮރެއްވި ޕޯސްޓެއްގަ އެވެ.
ޝިޔާމް ވިދާޅުވީ ރައީސް ޑރ މުއިއްޒު ރައީސުލްޖުމްހޫރިއްޔާކަމުގެ ހުވާ ކުރެއްވި ހިނދުން ފެށިގެން ދިވެހީންނަށް ހިތްހަމަޖެހުމުގެ އިހުސާސް ކުރެވެން ފަށައިފި ކަމަށެވެ. އަދި ހުވާ ކުރެއްވުމަށްފަހު ރައްޔިތުންނާއި މުޚާތަބުކުރައްވާ ދެއްވި އެންމެ ފުރަތަމަ ތަޤުރީރާއެކު އެމަނިކުފާނުގެ ހިތްޕުޅުގައި ޤައުމާއި ރައްޔިތުންނަށް އޮތް ލޯބި ހާމަކޮށްދެއްވާފައިވާ ކަމަށެވެ.
ޝިޔާމް ވިދާޅުވީ ރައީސް ޑރ މުއިއްޒުގެ ސަރުކާރުން ކުރުމަށް ވަރަށް ގިނަ ކަންކަން ހުރިކަމަށެވެ. އެހެން ނަމަވެސް، އެމަނިކުފާނު ރައްޔިތުންނަށް ވީ ވައުދުފުޅުތަކަށް ފުރަގަސް ނުދެއްވާނެކަން އެ ވައުދުތައް ލިޔެ ފޮތެއްގެ ސިފައިގައި ނެރުމުން ހާމަވެގެންދާކަމަށް ޝިޔާމް ވިދާޅުވި އެވެ.
" ރައީސް ޑރ. މުޢިއްޒުގެ އާސަރުކާރުން ކުރަންހުރި ކަންކަން ލައްކަ ބައިވަރެވެ. ރައީސްގެ ހުރިހާ ވަޢުދުފުޅުތަކެއް އެހުރީ ބަހުން ބަހަށް އަދި އަކުރުން އަކުރަށް ދެލިކުރެވި 953 ގަނޑުގެ ބޯފޮތެއްގައި ޝާއިއު ކުރެވިފައެވެ. އެއީ ރައްޔިތުންނަށް ވެވަޑައިގެންނެވި ވަޢުދުފުޅުތަކަށް ފުރަގަސް ނުދެއްވާނެކަމުގެ ދަލީލެކެވެ"
ފިޝަރީސް މިނިސްޓަރު ޝިޔާމް
އެކަން ފާހަގަކުރައްވާ ޝިޔާމް ވިދާޅުވީ ރައީސް ޑރ މުއިއްޒު ކުރައްވާނީ ދެ ފުށްފެންނަ ހާމަކަން ބޮޑު ވެރިކަމެއްކަން މި ކަންކަމުން ހާމަވެގެންދާ ކަމަށެވެ.
އެމަނިކުފާނަކީ ދިވެހީންގެ އެންމެ ބޮޑު އުންމީދު ކަމަށާއި، އެމަނިކުފާނުގެ ވެރިކަމުގައި ރައްޔިތުންނަށް ވީ ވައުދުތައް ފުއްދަވާދެއްވާ ތަފާތު ދައްކަވާދެއްވާނެކަމުގެ ޔަގީންކަން އޮތް ކަމަށް ޝިޔާމު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
