ރައްޔިތުންގެ މަޖިލީހުގެ ރައީސާއި، ނާއިބު ރައީސް މަޖިލީހުގެ ތަޅުމުގައި ނެތް ހާލަތްތަކުގައި، ރިޔާސަތު ބަލަހައްޓަވާނެ ބޭފުޅުންގެ ލިސްޓް ތަރުތީބު ކުރައްވައިފިއެވެ. 

މަޖިލީހުގެ މިހާރު ކުރިއަށްދާ ޖަލްސާގައި ރިޔާސަތުގައި އިންނެވި، މަޖިލީހުގެ ރައީސް މުހައްމަދު އަސްލަމް ވިދާޅުވީ، މަޖިލީހުގެ ރައީސާއި ނާއިބު ރައީސް މަޖިލީހުގެ ޖަލްސާއެއްގެ ރިޔާސަތު ބެލެހެއްޓެވުމަށް އުޒުރުވެރިވެވަޑައިގަންނަވާ ހާލަތުގައި، މަޖިލީހުގެ ރިޔާސަތު ބަލަހައްޓަވަން ޖެހެނީ މެދުކެނޑުމެއްނެތި އެންމެ ގިނަ ދުވަސް ވަންދެން މަޖިލީހަށް ޚިދުމަތްކުރެއްވި މެންބަރުންގެ ތެރެއިން ކަނޑައަޅާފައިވާ ފަސް މެންބަރަކު ކަމަށެވެ. 

އެގޮތުން، އެ ގަވާއިދުގެ މަތިން، އަސްލަމް ވަނީ ރައީސާއި ނާއިބު ރައީސް ނެތް ހާލަތުގައި ރިޔާސަތު ބެލެހެއްޓެވުމަށް ފުރުސަތު ދެވޭނެ ތަރުތީބު އިއުލާން ކުރައްވާފައެވެ. 

Advertisement

އެއީ؛ 

1) މީދޫ ދާއިރާގެ މެންބަރު އަހުމަދު ސިޔާމް (ސަން ސިޔާމް)-- ސިޔާމް ވަނީ 27 ފެބްރުއަރީ 2005 އިން ފެށިގެން މިއަދާއި ހަމައަށް، މެދުކެނޑުމެއްނެތި 18 އަހަރާއި 8 މަސްދުވަހު މަޖިލީހުގައި ޚިދުމަތްކުރައްވާފައި. 

2) މާމިގިލީ ދާއިރާގެ މެންބަރު ގާސިމް އިބްރާހިމް-- ގާސިމް ވަނީ 28 މެއި 2009 އިން ފެށިގެން މިއަދާއި ހަމައަށް މެދުކެނޑުމެއްނެތި 14 އަހަރާއި 5 މަސްދުވަހު މަޖިލީހަށް ޚިދުމަތްކުރައްވާފައި.

3) އޭދަފުށީ ދާއިރާގެ މެންބަރު އަހުމަދު ސަލީމް-- ސަލީމް ވަނީ 28 މެއި 2009 އިން ފެށިގެން މިއަދާއި ހަމައަށް 14 އަހަރާއި 5 މަސްދުވަހު މަޖިލީހަށް ޚިދުމަތްކުރައްވާފައި.

4) ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ-- އަބްދުލްޣަފޫރު ވަނީ 28 މެއި 2009 އިން ފެށިގެން މިއަދާއި ހަމައަށް 14 އަހަރާއި 5 މަސްދުވަހު މަޖިލީހަށް ޚިދުމަތްކުރައްވާފައި.

5) ކުޑަހުވަދޫ ދާއިރާގެ މެންބަރު އަހުމަދު އާމިރު-- އާމިރު ވަނީ 28 މެއި 2009 އިން ފެށިގެން މިއަދާއި ހަމައަށް 14 އަހަރާއި 5 މަސްދުވަހު މަޖިލީހަށް ޚިދުމަތްކުރައްވާފައި.

އަސްލަމް ވިދާޅުވީ، މެންބަރުންގެ ތަރުތީބު ކަނޑައެޅުއްވުމުގައި، އަމަލު ކުރައްވާފައިވާނީ މަޖިލީހުގެ ގަވާދުގެ މަތިން ކަމަށެވެ. އެގޮތުން، މަޖިލީހަށް ޚިދުމަތްކުރައްވާފައިވާ މުއްދަތުގެ އިތުރުން، އެ މުއްދަތު މެންބަރުންގެ މެދުގައި ހަމަހަމަ ވެފައިވާނަމަ، އިސްކަންދެއްވީ އުމުރުގެ ގޮތުން ދޮށީ ބޭފުޅުންނަށް ކަމަށް އޭނާ ވިދާޅުވި އެވެ.