ފަލަސްތީނުގައި ހަމަޖެހުން ޤާއިމްކުރެވޭނީ އިޒްރާއިލާއި ފަލަސްތީނާއި ދެ ގައުމު ސުލްހަކޮށް އެކުގައި އުޅެވޭނެ ގޮތެއް ހޯދައިގެންކަމަށް މަޖިލީހުގެ ކުރީގެ ރައީސް، އަދި މައްޗަންގޯޅި މެދު ދާއިރާގެ މެމްބަރު މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިފަދައިން ވިދާޅުވެފައި ވަނީ އިޒްރާއިލްގެ އުފެއްދުންތައް ރާއްޖެ އެތެރެކުރުން މަނާކުރުމާއި، އިޒްރާއިލްގެ ޕާސްޕޯޓުގައި ރާއްޖެ އެތެރެވުން ހުއްޓުވުމަށް ގޮވާލާ ރައްޔިތުންގެ މަޖިލީހުގެ ވިލިގިލި ދާއިރާގެ މެމްބަރު ސައުދު ހުށައަޅުއްވާފައިވާ ގަރާރަށް މަޖިލީހުގައި ވާހަކަދައްކަވަމުން ނެވެ.
ނަޝީދު ވިދާޅުވީ ޕަލަސްތީނުގެ މިނިވަންކަމަށްޓަކައި ހަނގުރާމަކުރަމުން އަންނަ ހަމާސް ނައްތާލުމުގެ ނަމުގައި ފަލަސްތީނަށް އިޒްރާއިލުން ދެމުންދާ ހަމަލާތަކަކީ އިންސާނިއްޔަތާއި ދެކޮޅަށް ދޭ ހަމަލާތަކެއް ކަމަށެވެ. އަދި އެއީ އެއްވެސް ހާަލަތެއްގައި ބަލައިގަނެވެިގެންވާނެ ކަމެއް ނޫން ކަމަށެވެ.
އެއާއެކު ނަޝީދު ވިދާޅުވީ މިނިވަންކަމަށްޓަކައި މަސައްކަތް ކުރުމަކީ އިންސާނީ ތަބީއަތް ކަމަށްވާއިރު، ހަމާސް ޖަމާއަތް ނައްތާލަން އުޅުނަސް އެކަން ނުކުރެވޭނެ ކަމަށެވެ.
އިޒްރާއިލުން ހުޅަނގުގެ އެހެން ގައުމުތަކުގެ ސަޕޯޓާއެކު ހަމާސް ނައްތާލުމުގެ މަސައްކަތް ކުރަމުން އަންނަތާ އެތައް އަހަރެއް ވެއްޖެ ކަމަށާއި، އެހެން ނަމަވެސް އަބަދުވެސް ފެނިގެންދަނީ އެންމެ ހީނުކުރާ ދަނޑިވަޅު ހަމާސްއިން ނިކުމެ އެމީހުންގެ މިނިވަންކަމަށްޓަކައި ހަމަލާދޭތަން ކަން ނަޝީދު ފާހަގަކުރެއްވި އެވެ.
އެކަން ފާހަގަކުރައްވާ ނަޝީދު ވިދާޅުވީ ފަލަސްތީނުގައި ހަމަޖެހުން ގާއިމްކުރުމަށްޓަކައި ދެ ގައުމު ސުލްހަކުރުން މުހިންމު ކަމަށެވެ. އަދި ދެ ގައުމަށް އެކުގައި އުޅެވޭނެ ގޮތެއް ހޯދައިގެން ނޫނީ، ފަލަސްތީނުގައި ހަމަޖެހުން ގާއިމް ނުކުރެވޭނެ ކަމަށް ނަޝީދު ވިދާޅުވި އެވެ.
"އަޅުގަނޑު ދެކޭގޮތުގައި ދެ ފަރާތް ގޮނޑިތަކުގައި ބައިތިއްބާ، މި ދެ ގައުމު ދެމެދުގައި ސުލްހަވެރިކަން ޤާއިމްކޮށް، މި ދެބައި މީހުންނަށް އެކީގައި އުޅެވޭނެ ގޮތެއް ނުހޯދޭހާ ހިނދަކު މި މައްސަލަ އަޅުގަނޑުމެންނަށް ކޮންމެ ދުވަހު... ކޮންމެ ދުވަހަކު ފެންނަމުން ދާނެ"
މެމްބަރު މުހައްމަދު ނަޝީދު
ނަޝީދު ވިދާޅުވީ ފަލަސްތީނުގެ ރައްޔިތުންގެ އެ ކެކުޅުމަކީ މުޅި އިންސާނިއްޔަތު ތަހަންމަލު ކުރަން ޖެހިފައި އޮތް ކެކުޅުމެއް ކަމަށެވެ. އަދި އެއީ ވަރަށް އަވަސް ޙައްލެއް ހޯދަން ޖެހޭ މައްސަލައެއް ކަމަށެވެ.
އޮކްޓޫބަރު މަހު އިޒްރާއިލްގެ ޔަހޫދީން ފަލަސްތީނަށް ދެމުންދާ ހަމަލާތައް ވަރުގަދަކޮށްފައިވާއިރު، މިހާތަނަށް ޣައްޒާގައި ޝަހީދުވި މީހުންގެ ރިކޯޑުތައް ނުބެލެހެއްޓޭހާ މައްޗަށް ގޮސްފައިވާކަމަށް އދ އިން ވަނީ ރިޕޯޓުކޮށްފަ އެވެ.
އޭގެ އިތުރުން ހަމަލާތަކުގައި ޒަޚަމްވާ މީހުންނަށް ފަރުވާދިނުމަށް ކަނޑައަޅާފައިވާ މައި ހޮސްޕިޓަލް "އަލް ޝިފާ" ބަންދުކުރުމަށް އިޒްރާއިލުން ދިން އިންޒާރާއެކު އެތަނުގެ ޚިދުމަތްތައް ވެސް ވަނީ ހުއްޓާލާފަ އެވެ.
މީ ފަލަސްތީނުގެ ނަސްލު ނައްތާލުމަށް ހިންގާ ގަތުލު އާންމެއްކަން ފާހަގަކޮށް ދުނިޔޭގެ އެކި ހިސާބުތަކުގައި އާންމު ރައްޔިތުން ނިކުމެ ވަރުގަދަ އިހުތިޖާޖުތަކެއް ކުރަމުންދާކަން ވެސް ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
