އަންނަ އަހަރު ބާއްވަން ޖެހިފައިވާ ރައްޔިތުންގެ މަޖިލީހުގެ އިންތިހާބު ރޯދައިގެ ކުރިން އިންތިހާބު ބޭއްވޭނެ ގޮތަށް ގާނޫނަށް އިސްލާހެއް ގެންނަން އިލެކްޝަންސް ކޮމިޝަން (އީސީ) އިން މަޖިލީހުގައި އެދެފި އެވެ.

އީސީން މިފަދައިން އެދިފައިވަނީ މިއަދު ކުރިއަށް ދިޔަ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގެ ބައްދަލުވުމުގެ ތެރެއިންނެވެ. 

އެގޮތުން އެ ކޮމިޓީގެ ބައްދަލުވުމުގައި ވާހަކަދައްކަވަމުން އީސީގެ ނާއިބު ރައީސް އިސްމާއީލް ހަބީބު ވަނީ، ގާނޫނުގައި ބުނާ ގޮތުން މިހާރު ކުރިއަށްދާ މަޖިލިސް ނިމުމުގެ 120 ދުވަސް ކުރިން ޖެހިގެން އަންނަ މަޖިލީހުގެ އިންތިޚާބު ބޭއްވުމުގެ ކަންކަން ފަށަން ޖެހޭކަން ފާހަގަކުރައްވާފައެވެ. މިހާރު ހިނގަމުންދާ 19 ވަނަ މަޖިލީހުގެ މެންބަރުންގެ ދައުރު ހަމަވާނީ 28 މެއި، 2024 އަށެވެ. 

ހަބީބު ވިދާޅުވީ ގާނޫނަށް ރިޢާޔަތްކޮށް 2024 ވަނަ އަހަރުގެ ރިޔާސީ އިންތިޚާބު ބާއްވާ ތާރީޚް ކަނޑައަޅާނަމަ، އެ އިންތިޚާބު ބޭއްވޭނެ ތާރީޚަކީ މާޗު 19 ގައި ކަމަށެވެ. އެހެން ނަމަވެސް އެއީ ސްކޫލްތަކުގައި މޮކް އެގްޒާމް ކުރިއަށްދާ ދުވަސްކޮޅަށްވެފައި، ވޯޓުލާ މަރުކަޒުތަކުގެ ގޮތުގައި ސްކޫލްތައް ބޭނުންކުރާތީ އޭގެ ފަހުގެ ތާރީޚަކަށް އިންތިޚާބު ފަސް ކުރަންޖެހޭ ކަމަށް އޭނާ ވިދާޅުވި އެވެ.

މިއަދު ކުރިއަށް ދިޔަ މިނިވަން މުއައްސަސާތަކުގެ ކޮމިޓީ ބައްދަލުވުމުގެ ތެރެއިން--ފޮޓޯ/މަޖިލިސް

އެގޮތުން އިންތިޚާބު ފަސް ކުރަން ބަލާއިރު، ދެން ޓެސްޓްތައް ނިންމައި އިންތިޚާބު ބޭއްވެން އަންނަނީ މާޗު 30 ގައި ކަމަށާ ނަމަވެސް އެއީ ރޯދަ މަހުގެ 20 ވަނަ ދުވަސް ކަން ހަބީބް ފާހަގަކުރެއްވިއެވެ. އެހެން ކަމުން، އެއީ ރޯދައިގެ ފަހު ދިހައަކަށް ވާއިރު، އެ ދުވަސްވަރު އިންތިޚާބު ބޭއްވުމަކީ ބޮޑެތި ގޮންޖެހުމްތަކާއި ކުރިމަތިވާނެ ކަމެއް ކަމަށް ހަބީބު ވިދާޅުވި އެވެ. އަދި އެދުވަސްވަރު ކެންޕެއިން ކުރުމަށްވެސް ކެންޑިޑޭޓުންނަށް ދަތިތަކާއި ކުރިމަތިވާނެ ކަމަށް އޭނާ ވިދާޅުވި އެވެ. 

އެކަން ހައްލު ކުރުމަށް ހަބީބު ވަނީ ގާނޫނަށް ބަދަލު ގެންނަން ހުށަހަޅުއްްވާފައެވެ. އެގޮތުން ކެންޑިޑޭޓުން ކެމްޕެއިން ކުރުމަށް ގާނޫނުން ދީފައިވާ 30 ދުވަހުގެ މުއްދަތު 20 ދުވަހަށް ކުރު ކޮށްލައިގެން ނުވަތަ، އިންތިޚާބުގެ މަސައްކަތް ފަށަން ގާނޫނުގައި ބުނާ 120 ދުވަހުގެ މުއްދަތު 140 އަށް އިތުރު ކޮށްދިނުމަށް ހަބީބު ވަނީ ހުށަހަޅުއްވާފައެވެ. 

އީސީގެ ހުށަހެޅުމާއި ގުޅިގެން މިނިވަން މުވައްސަސާތަކާއި ބެހޭ ކޮމިޓީން ވަކި ގޮތެއް އަދި ނުނިންމައެވެ.