ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުގެ އަމާޒަކީ ހާރިޖީ ގުޅުންތައް ވަރުގަދަކޮށް ރާއްޖެއަށް ހަލުވި ދުވެލީގައި ތަރައްގީ ގެނެސް ދިނުން ކަމަށް ކުޅިވަރާއި ހަށިހެޔޮކަމާ ބެހޭ މިނިސްޓްރީގެ ޑެޕިއުޓީ މިނިސްޓަރު އަދި ޕީޕީއެމް/ޕީއެންސީގެ ސެނެޓް މެމްބަރު ހުސެއިން ޝިފާޒް ވިދާޅުވެއްޖެއެވެ.
ރައީސް ޑރ.މުޢިއްޒު ތުރުކީ އަށް ކުރެއްވި ކާމީޔާބު ރަސްމީ ދަތުރުފުޅު ނިންމަވާލައްވަަި ކޮޕް28 ބައްދަލުވުމުގައި ބައިވެރިވެވަޑައިގަތުމަށް އެކުވެރި ޢަރަބި އިމާރާތަށް (ޔޫއޭއީ) ވަޑައިގެންނެވުމާއި ގުޅިވެން ޝިފާޒު ކުރެއްވި ޓްވީޓެއްގައި ވިދާޅުވީ، ރައީސް މުއިއްޒުގެ ސަރުކާރުގެ އަމާޒަކީ ގައުމުތަކާ އެކީގައި ހާރިޖީ ގުޅުންތައް ބަދަހިކޮށް، ރާއްޖެ އަށް ހަލުވި ދުވެލީގައި ތަރައްގީތަކެއް ގެނައުން ކަމަށެވެ.
"ރާއްޖެ އޮތީ ބައިނަލްއަގުވާމީ މައިދާނުގައި އާ އުސްމިންތަކަކަށް އަރައި މޫސުމަށް އަންނަ ބަދަލުތަކަށް ހޭލުންތެރިވުމަށް ވަކާލާތު ކުރުމުގައި މުހިންމު ދައުރެއް އަދާކުރުމަށް ކެތްމަދުވެފައި"
ހުސައިން ޝިފާޒް
ޝިފާޒް މިހެން ވިދާޅުވެފައި ވާއިރު، ރައީސް ޑރ. މުޢިއްޒު ތުރުކީ އަށް ކުރެއްވި މި ދަތުރުފުޅުގައި އެމަނިކުފާނު ވަނީ އެ ގައުމުގެ ސަރުކާރުގެ އިސްވެރިންނާއެކު މުހިއްމު ބައްދަލުވުންތަކެއް ކުރިއަށް ގެންގޮސްފައެވެ. އެގޮތުން، އެކި ދާއިރާތަކުން ދިވެހީ ރާއްޖެއަށް އެހީވުމަށް ތުރުކީއާއެކު މަޝްވަރާ ކުރެވިފައިވެއެވެ.
އަދި ރައީސް މުޢިއްޒުގެ އެ ދަތުރުފުޅުގައި ތުރުކީގައި ދިވެހި ރާއްޖޭގެ އެންބަސީއެއް ހުޅުވުމުގެ މަސައްކަތް ކުރައްވާނެ ކަމަށްވެސް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
