ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮން ކްލައިމެޓް ޗޭންޖް (ކޮޕް-28) ސަމިޓުގައި މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުމަށް ބަދަލު ދޭން ނިންމުމުން ދިވެހިރާއްޖެއިން މަރުހަބާ ކިޔައިފި އެވެ.
ދުބާއީގައި ކުރިއަށް ދާ ކޮޕް-28 ސަމިޓު މިފަދައިން ނިންމެވިކަމަށްޓަކައި މިނިސްޓަރ އޮފް ފޮރިން އެފެއާޒް މޫސާ ޒަމީރު އަދި މިނިސްޓަރ އޮފް ކްލައިމެޓް ޗޭންޖް، އެންވަރަންމަންޓް އެންޑް އެނާޖީ ތޯރިގު އިބްރާހިމް ވަނީ އެއީ ވަރަށް މުހިންމު ނިންމެވުމެއްކަން ފާހަގަކުރައްވާ މަރުހަބާ ދަންނަވާފަ އެވެ.
އެގޮތުން އެ ނިންމުމާއި ގުޅޭގޮތުން މިނިސްޓަރު ޒަމީރު ވިދާޅުވީ ލޮސް އެންޑް ޑެމޭޖް ފަންޑް ގާއިމްކުރުމަކީ ސަމިޓު ފެށުމަށްޓަކައި ކުރި ވަރަށް މުހިންމު މަސައްކަތެއް ކަމަށާއި، މީ ރަނގަޅު މިސްރާބަކަށް ގެންދިއުމަށް އެޅި ރަނގަޅު ފިޔަވަޅެއް ކަމަށެވެ.
ކޮޕް-28 ގެ ނިންމުމާއި ގުޅޭގޮތުން މިނިސްޓަރު ޠާރިގު ވިދާޅުވީ މި ފަންޑަކީ ރާއްޖެ ފަދަ ބިން ތިރި، ޖަޒީރާ ގައުމުތަކަށް ވަރަށް މުހިންމު ފަންޑަކަށް ވާނެ ކަމަށެވެ.
އޭގެއިތުރުން ސަމިޓުން މިފަދަ މުހިންމު ނިންމުމެއް ނިންމުމުން މޫސުމަށް އަންނަ ބަދަލުތަކާ ދެކޮޅަށް ކުރަމުންދާ މަސައްކަތް ދައްކުވައިދޭ ކަމަށް މިނިސްޓަރު ޠާރިގު ވިދާޅުި އެވެ.
މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުމަށް ބަދަލު ދިނުމަށް ފަންޑެއް ގާއިމް ކުރުމަކީ މިދިޔަ އަހަރު ބޭއްވި ކޮޕް-27 ސަމިޓުގައި ނިންމި ނިންމުމެކެވެ.
މި ފަންޑުން އެހީ ފޯރުކޮށް ދެމުން ދާނީ ދުނިޔޭގެ އެންމެ ފަގީރު އަދި އެންމެ ނާޒުކު ގައުމުތަކަށް މޫސުމަށް އަންނަ ކާރިސާތަކުގެ ސަބަބުން ލިބޭ ގެއްލުންތަކަށެވެ.
ފަންޑަށް ސަމިޓު ބާއްވާ ގައުމު ޔުނައިޓެޑް އެރެބް އެމިރޭޓްސް (ޔޫއޭއީ) އިން އަދި ޖަރުމަނުން 100 މިލިއަން ޑޮލަރުގެ އިތުރުން ޔޫކޭއިން 60 މިލިއަން ޕައުންޑް، ޔޫއެސްއިން 17.5 މިލިއަން ޑޮލަރު އަދި ޖަޕާނުން 10 މިލިއަން ޑޮލަރު ދޭނެކަން ހާމަ ކުރި އެވެ.
ސަމިޓުގައި ބައިވެރިވާ ބޮޑެތި ގައުމުތަކުން އިއުލާން ކުރި އަދަދުތަކާއެކު ފަންޑުގެ ޖުމްލަ އަދަދު މިހާރު 429 މިލިއަން ޑޮލަރާ ގާތްކުރެ އެވެ.
Advertisement
This content is created and paid for by advertisers and does not involve Voice Journalists
