އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ބަޖެޓްގެ ބަހުސް މިއަދު ނިންމާލައި ބަހުސަށް ވޯޓަށް އެހުން މާދަމާއަށް ތާވަލުކޮށްފިއެވެ. 

އަންނަ އަހަރަށް ލަފާކޮށް ދައުލަތުން ރައްޔިތުންގެ މަޖިލީހަށް ހުށަހެޅީ 49.5 ބިލިއަން ރުފިޔާގެ ބަޖެޓެކެވެ.  އެހެން ނަމަވެސް ބަޖެޓު ދިރާސާ ކުރުމަށް ފަހު ކޮމިޓީން ފާސްކޮށްފައިވަނީ 300 މިލިޔަން ރުފިޔާ އިތުރުކޮށް 49.8 ބިލިއަން ރުފިޔާގެ ބަޖެޓެކެވެ. މި ބަޖެޓަށް މިއަދު ބަހުސްކޮށްފައިވާއިރު، މިއަދުގެ ޖަލްސާގައި 44 މެންބަރަކު ވަނީ ބަޖެޓަށް ބަހުސްކޮށްފައެވެ.

އިއްޔެއާއި މިއަދު ވެސް ކުރިއަށް ދިޔަ ބަޖެޓު ބަހުސް ނިންމާލިކަން މިއަދުގެ ޖަލްސާގައި ހާމަކުރައްވާ މަޖިލީހުގެ ރައީސް، މުހައްމަދު އަސްލަމް ވިދާޅުވީ މާދަމާގެ ޖަލްސާގައި ބަޖެޓަށް ވޯޓަށް އަހާނެ ކަމަށެވެ.

ބަޖެޓު ދިރާސާ ކުރުމަށް ފަހު ކޮމިޓީން ބަޖެޓަށް ގެނައި އެންމެ ބޮޑު އެއް ބަދަލަކީ ރައީސް ޑރ. މުހައްމަދު މުއިއްޒުގެ ސަރުކާރުން ހިންގުމަށް ނިންމާފައިވާ ބޯހިޔާވަހިކަމުގެ އެންމެ ބޮޑު މަޝްރޫއު ކަމަށްވާ ފުށިދިއްގަރުފަޅުގެ މަޝްރޫއު ހިންގުމަށް ކަނޑައެޅި 400 މިލިއަން ރުފިޔާ، އެމްޑީޕީގެ މެޖޯރިޓީ އޮންނަ މަޖިލީހުގެ ކޮމިޓީން ކަނޑާލައި، އެހެން މަޝްރޫއުތަކަށް ބަހާލުމެވެ. އެ މަޝްރޫއު ހުށަހަޅާފައިވަނީ ޕީއެސްއައިޕީ މަޝްރޫއެއްގެ ގޮތުގައެވެ.

ފުށިދިއްގަރުފަޅު ހިމެނޭހެން ހުޅުމާލެ އާއި ގުޅީފަޅާއި، ގިރާވަރު ފަޅުން ލިބޭ އެންމެ ބޮޑުމިނަކަށް ހިއްކައިގެން 65،000 ގެދޮރު ގާއިމުކުރުމުގެ މަޝްރޫއު ކުރިއަށްގެންދަން ޕީޕީއެމް/ޕީއެންސީގެ މެނިފެސްޓޯގައި ވަނީ ހިމަނައިފައެވެ. އަދި ފުށިދިއްގަރުފަޅުން އެކަނި 11،900 އަށް ވުރެ ގިނަ ގޯއްޗާއި 26،000 ފްލެޓް އިމާރާތް ކުރުމަށް މެނިފެސްޓޯގައިވެއެވެ.