ހުސްވެފައިވާ މާލެސިޓީ ކައުންސިލްގެ މޭޔަރ ކަމުގެ މަގާމަށް ވާދަކުރައްވާ ކެންޑިޑޭޓުންގެ މެދުގައި ބާއްވާ ބަހުސް އަންނަ މަހުގެ 6 ވަނަ ދުވަހު ބާއްވާ ގޮތަށް ހަމަޖެހިއްޖެއެވެ. 

މާލޭ މޭޔަރ ކަމުގެ މަގާމުގައި ހުންނެވި، ޑރ. މުހައްމަދު މުޢިއްޒު، ރައީސުލްޖުމްހޫރިއްޔާ ކަމުގެ މަގާމާއި ހަވާލުވެވަޑައިގެންނެވުމަށް މޭޔަރ ކަމުން އިސްތިއުފާ ދެއްވުމާއެކު ހުސްވި އެ މަގާމަށް، ޖުމުލަ 5 ކެންޑިޑޭޓުން ވާދަކުރެއެވެ. އެއީ؛ 

1) ޕީޕީއެމް/ޕީއެންސީގެ ފަރާތުން ވާދަކުރައްވަނީ ކުރީގެ ބަންޑާރަ ނައިބު ޢާއިޝަތު ޢާޒިމާ ޝަކޫރު

2) އިދިކޮޅު މައި ޕާޓީ، އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާދަމް އާޒިމް

3) ދަ ޑިމޮކްރެޓްސްގެ ފަރާތުން ގަލޮޅު އުތުރު ދާއިރާގެ ކައުންސިލް މެމްބަރުކަން ކުރައްވަމުން ގެންދަވާ ސައިފް ފާތިހު

4) އަމިއްލަ ގޮތުން ކުރީގެ ސީޕީ އަދި ރައީސް ޔާމީންގެ އައު ޕާޓީ އުފެއްދެވުމަށް އިސްކޮށް މަސައްކަތް ކުރައްވާ ހުސައިން ވަހީދު 

5) އަމިއްލަ ގޮތުން ޝުއައިބު އަލީ 

އެ ފަސް ކެންޑިޑޭޓުންގެ މެދުގައި ބާއްވާ ބަހުސް އަންނަ މަހު 6 ގައި ބޭއްވުމަށް ނިންމައި، ބަހުސްކުރާ ތަރުތީބު ކަނޑައެޅުމަށް ކުރިއަށް އޮތް ހަފްތާގައި ކެންޑިޑޭޓުންގެ ގުރުއަތު ނެގުން ކުރިއަށް ގެންދިއުމަށް ނިންމާފައިވާ ކަމަށް ޕީއެސްއެމް އިން ވަނީ ބުނެފަ އެވެ.

މާލޭ މޭޔަރު ކަމުގެ މަގާމަށް ބޭފުޅަކު އިންތިހާބުކުރުމަށް ބާއްވާ ބައި އިލެކްޝަނާއި، މާފަންނު ދެކުނު ދާއިރާއަށާއި މެދުހެންވޭރު ދާއިރާއަށާއި ހެންވޭރު ދެކުނު ދާއިރާ/ އަންހެނުންނަށް ޚާއްސަކޮށްފައިވާ ގޮނޑިއަށް މެންބަރުން އިންތިޚާބުކުރުމަށް ބާއްވާ ބައި-އިލެކްޝަން ވެސް އޮންނާނީ އަންނަ މަހު 13 ގައެވެ.