އަންނަ އަހަރުން ފެށިގެން ކޮންމެ އަހަރެއްގެވެސް ރަމަޟާން މަހުގެ ފަހު 10 ގެ ދުވަސްތަކުގައި ސަރުކާރު ބަންދުކުރަން ރައީސުލްޖުމުހޫރިއްޔާ ޑރ. މުހައްމަދު މުޢިއްޒު މިއަދު ނިންމަވައިފި އެވެ.

ރައީސުލްޖުމްހޫރިއްޔާގެ ކެބިނެޓުން މިއަދު ނިންމެވި ނިންމުންތަކާއި ގުޅޭ ގޮތުން ނޫސްވެރިންނަށް މަޢުލޫމާތުދެއްވަމުން ރައީސް އޮފީހުގެ ޗީފް ސްޕޯކްސްޕާސަން މުހައްމަދު ޝަހީބު ވިދާޅުވީ، ރައީސް މުޢިއްޒުގެ އެ ނިންމެވުމަކީ، އިސްލާމީ އުސޫލުތައް ގާއިމުކުރުމާއި، ދީނީ ކަންކަމަށް ރައްޔިތުން ލޯބި ޖެއްސުމާއި، ދީނީ ކަންކަމަށް އިސްކަން ދިނުމަށް ފުރުޞަތު ދިނުމުގެ ގޮތުން ނިންމެވި ނިންމެވުމެއް ކަމަށެވެ. 

ރޯދަމަހުގެ ފަހު 10 ބަންދުކުރުމަކީ ރައީސް ޑރ. މުއިއްޒުގެ ރިޔާސީ ވައުދެކެވެ.

އެގޮތުން، މިއަހަރުގެ އޮގަސްޓު 30 ވަނަ ދުވަހު، ބ. އޭދަފުށީގައި ބޭއްވުނު ކެންޕެއިން ޖަލްސާގައި އެމަނިކުފާނު ވަނީ، އެމަނިކުފާނުގެ ވެރިކަމެއްގައި އެންމެ އިސްކަމެއް ދޭނެ ކަމަކީ އިސްލާމީ އުސޫލުތައް ގާއިމްކުރުމާއި ދީނީ ކަންކަމަށް ރައްޔިތުން ލޯބި ޖެއްސުމަށް ކަމަށާ، އަދި ރައްޔިތުންނަށް ދީނީ ކަންކަމަށް އިސްކަން ދިނުމަށް ފުރުސަތުތައް ފޯރުކޮށްދެއްވުން ކަމަށް ވިދާޅުވެފައެވެ.

އަދި އެ ސިޔާސަތުގެ ދަށުން، ސަރުކާރު މުވައްޒަފުންނަށް އަޅުކަންތައްތަކަށް ވަގުތު ދިނުމަށް ފުރުސަތު ދޭން ރަމަޟާން މަހުގެ ފަހު 10 އެއް އެއީ ސަރުކާރު ބަންދު ދުވަސްތަކެއްގެ  ގޮތުގައި ހަމަޖައްސަވާނެ ކަމަށް މުއިއްޒު ވިދާޅުވި އެވެ. 

ހަމައެއާ އެކު ރަމަޟާން މަހުގެ ފަހު 10 އެއް އެއީ ގްރޭޑް އަށަކުން ތިރީގެ ގްރޭޑްތަކުގެ ދަރިވަރުންނަށް ބަންދު ދުވަސްތަކެއް ކަމަށް ކަނޑައަޅާނެ ކަމަށް ވެސް މުއިއްޒު ވިދާޅުވި އެވެ. 

"އަށެއް، ނުވައެއް، ދިހައެއް، އެގާރަ، ބާރައިގެ ކުދިން އެ ކަނޑައަޅާ ނިޒާމެއްގެ ތެރެއިން ކުރިއަށް ގެންދެވޭނެ. އެކަމަކު އަށަކުން ދަށުގެ ހުރިހާ ދަށުގެ ހުރިހާ ކުދިންނަށް ބަންދުވާނެ،" މުޢިއްޒު ވިދާޅުވިއެެވެ.