ދިވެހިރާއްޖޭގެ މަސްވެރިކަމުގެ ސިނާއަތް އިސްތިހާރުކޮށް މާކެޓުކުރުމަށް "މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިންގ އެންޑް ޕްރޮމޯޝަން ކޯޕަރޭޝަން"ގެ ނަމުގައި ޚާއްސަ ކުންފުންޏެއް އުފެއްދެވުމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ނިންމަވައިފި އެވެ. 

ރައީސުލްޖުމްހޫރިއްޔާ މިފަދައިން ނިންމަވާފައިވަނީ މިއަދު ބޭއްވެވި ވަޒީރުންގެ މަޖިލީހުގެ ބައްދަލުވުމުގައި މަޝްވަރާކުރެއްވުމަށް ފަހުގައެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ކެބިނެޓުގެ ނިންމުންތައް ހިއްސާކުރައްވަމުން ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން މުޙައްމަދު ޝަހީބް ވިދާޅުވީ މަސްވެރިކަން ޕްރޮމޯޓުކުރުމަށް ޚާއްސަ ކުންފުންޏެއް އުފެއްދެވުމަށް ނިންމާފައިވާއިރު، އެކަމަށް ބޭނުންވާ 37 މިލިއަން ރުފިޔާ އަންނަ އަހަރުގެ ދައުލަތުގެ ބަޖެޓުގައި ހިމެނުމަށް ވެސް ނިންމަވާފައިވާ ކަމަށެވެ.

އެއާއެކު ކުރިން އޮތް ފިޝަރީސް ޕްރޮމޯޝަން ބޯޑު އުވާލަން ނިންމަވާފައިވާ ކަމަށް ވެސް ޝިހާބު ވިދާޅުވި އެވެ.

ދިވެހިރާއްޖޭގެ މަސްވެރިކަމުގެ ސިނާއަތް އިސްތިހާރުކުރުމަށް އުފައްދާ މި ކުންފުނީގެ ބޭނުމަކީ ރާއްޖޭގެ އުފެއްދުންތަކަށް ޚާއްޞަ ބްރޭންޑެއް ތަޢާރުފުކޮށް، އެ ތަކެތި ޕްރިމިއަމް އުފެއްދުންތަކެއްގެ ގޮތުގައި ޤައުމީ އަދި ބައިނަލްއަގުވާމީ މާރކެޓްތަކަށް ނެރުމާއި އުފެއްދުންތަކަށް އައު މާކެޓުތައް ހޯދުމަށް މަސައްކަތް ކުރުމެވެ. 

ފަތުރުވެރިކަމެކޭ އެއްގޮތަށް މަސްވެރިކަމުގެ ސިނާއަތު އިސްތިހާރުކޮށް، ދިވެހި މަސްވެރިންގެ އުފެއްދުންތައް ބްރޭންޑުކުރުމަކީ ސަރުކާރުން ޚާއްސަ ސަމާލުކަމެއް ދޭ ކަމެއްކަން ޝަހީބު ފާހަގަކުރެއްވި އެވެ. 

މަސްވެރިކަމުގެ ދާއިރާގެ އުފެއްދުންތައް މާކެޓުކުރުމަށް ޚާއްޞަ އެޖެންސީއެއް އުފެއްދުމަކީ ސަރުކާރުގެ ހަފުތާ 14 މަގުޗާޓުގައި ހިމަނުއްވާފައިވާ މުހިންމު މަސައްކަތެކެވެ. 

އޭގެ އިތުރުން ދިވެހި މަސްވެރިން ބާނާ މަހާއި، މަހުގެ ބާވަތްތައް އެކްސްޕޯޓުކުރާނެ އާ މާކެޓުތަކެއް ހޯދުމަކީވެސް ސަރުކާރުން ޚާއްސަ އިސްކަމެއް ދީގެން ކުރައްވާނެ ކަންކަމުގެ ގޮތުގައި ހަފްތާ 14 މަގުޗާޓުގައި ފާހަގަކޮށްފައިވާ ކަންކަމެވެ.