މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) ގެ މެނޭޖިން ޑިރެކްޓަރުގެ މަގާމަށް ފާތިމަތު ތައުފީގު އައްޔަން ކޮށްފި އެވެ. 

އެމްއެމްޕީއާރްސީގެ އެމްޑީ ކަމަށް ފާތިމަތު ތައުފީޤު އައްޔަނު ކުރެއްވި ކަން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)އިން އިއްޔެ ވަނީ އިއުލާން ކޮށްފައެވެ. 

އަދި އެމްއެމްޕީއާރުސީންވެސް އެކަން އިއުލާންކޮށްފައިވާއިރު މިއަދު އޭނާ ވަނީ އޮފީހަށް ވެސް ނިކުންނަވަން ފައްޓަވައިފަ އެވެ.

ވިލާ ކޮލެޖުން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާޒް ހާސިލްކުރައްވާފައިވާ ފާތިމަތު ތައުފީޤަކީ ޕީޕީއެމްގެ އައްޑޫ މީދޫ ދާއިރާގެ ނައިބު ރައީސެވެ. 

ވެމްކޯގެ އެޑްމިން އެންޑް ޕްރޮކިއުމަންޓް މެނޭޖަރު ކަމުގެ މަގާމާއި، ޖަލްބޫޓް މޯލްޑިވްސްގައި އެޗްއާރު އެންޑް އެޑްމިން މެނޭޖަރުކަން ކުރެއްވުމުގެ އިތުރުން ފާތިމަތު ތައުފީޤު ވަނީ އެލިއާ އާއި އެންވަޔަރުމަންޓް ޕްރޮޓެކްޝަން އެޖެންސީގައި ވެސް މަސައްކަތް ކުރައްވާފައެވެ. 

އެމްއެމްޕީއާރްސީގެ އެމްޑީގެ މަގާމުގައި ކުރިން ހުންނެވީ ޓީވީއެއްގައި މަސައްކަތް ކުރެއްވި ތޮއްޔިބު މުހައްމަދު އެވެ.