ސިޔާސީ ސަބަބުތަކަށްޓަކައި ރައްޔިތުންގެ މަޖިލީހުން އަމަލުކުރާ އުސޫލުތައް ބަދަލުކުރުމަކީ ވަރަށް ދެރަކަމެއް ކަމުގައި ބަންޑާރަ ނާއިބް އަޙްމަދު އުޝާމު ވިދާޅުވެއްޖެއެވެ. 

ބަންޑާރަ ނާއިބް އަހްމަދު އުޝާމް މިފަދައިން ވިދާޅުވެފައިވަނީ ވަޒީރުންނަށް ރުހުންދިނުމުގެ މައްސަލާގައި ރައްޔިތުންގެ މަޖިލީހުގެ ރިޔާސަތުން މިއަދު އަމަލުކުރި ގޮތާއި މެދު ކަންބޮޑުވުން ފާޅުކުރައްވައި ކުރެއްވި ޓުވީޓެއްގައެވެ. 

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ކެބިނެޓުގެ ވަޒީރުންނަށް ވަކިވަކިން ރުހުން ހޯދުމަށް އެހުމަށް ފާސްކޮށް ރައްޔިތުންގެ މަޖިލީހުގެ ކޮމިޓީން މަޖިލީހުގެ ތަޅުމަށް ރިޕޯޓް ފޮނުވާފައި ވާއިރު، މިއަދު އޮތީ ކެބިނެޓަށް ރުހުންދޭން އެޖެންޑާ ކޮށްފައެވެ. 

އެޖެންޑާ އިއުލާން ކުރުމާއި އެކު، ރައްޔިތުގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިން ނިޒާމީ ނުކުތާއެއް ނަންގަވައި އެ ރިޕޯޓުގައި ވުޒާރާތަކުގެ މެންޑޭޓު ފާސްކޮށްފައި ނެތުމުގެ ސަބަބުން އެ ރިޕޯޓު ފުރިހަމަނުވާކަމަށް ވަނީ ވިދާޅުވެފައެވެ. 

އެޔާއެކު އެ ނިޒާމީ ނުކުތާ ބަލައިގަންނަވައި، އެ ރިޕޯޓު އަލުން ކޮމިޓީއަށް ފޮނުއްވަން މަޖިލީހުގެ ރައީސް މުޙައްމަދު އަސްލަމް ނިންމެވިއެވެ.

މިކަމަށް އިޝާރާތް ކުރައްވައި ބަންޑާރަ ނާއިބް އަހްމަދު އުޝާމް ކުރެއްވި ޓުވީޓެއްގައި ވިދާޅުވީ، ޤާނޫނު އަސާސީ 116 ވަނަ މާއްދާގެ ދަށުން ވުޒާރާތަކުގެ މެންޑޭޓު ފާސްކުރަން ރައްޔިތުންގެ މަޖިލީހަށް ހުށަހެޅުމާއި، ޤާނޫނު އަސާސީގެ 129 ވަނަ މާއްދާގެ ދަށުން ވަޒީރުންނަށް ރުހުން ދިނުމަކީ މުޅިން ތަފާތު ދެ ކަމެއް ކަމަށެވެ.

އަދި މީގެ އިތުރުން މީގެ ކުރިން ރައްޔިތުންގެ މަޖިލިހުގައި މިކަމުގައި އަމަލުކުރަމުން އައީވެސް އެއީ މުޅިން ތަފާތު ދެ ކަމެއްގެ ގޮތުގައި ބަލައިގެންކަމަށެވެ. އެގޮތުން 2018 ވަނަ އަހަރުވެސް ވަޒީރުންގެ މަޖިލީހަށް ރުހުން ހޯދަން ފޮނުވީ އެ އަހަރުގެ ނޮވެންބަރު 22 ވަނަ ދުވަހު ކަމަށާއި ޑިސެންބަރު 4 ވަނަ ދުވަހު ރުހުން ދިން ކަމަށް އުޝާމް ވަނީ ވިދާޅުވެފައެވެ. 

އަދި އެފަހަރު ވުޒާރާތަކުގެ މޭންޑޭޓު ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ރައްޔިތުންގެ މަޖިލީހަށް ހުށަހެޅުއްވީ ވަޒީރުންނަށް މަޖިލީހުން ރުހުންދިން ފަހުން އެ އަހަރުގެ ޑިސެންބަރު މަހުގެ 13 ވަނަ ދުވަހުގައިކަމަށް އުޝާމު ވިދާޅުވިއެވެ.