ބޮޑެތި ބަލިތަކަށް ފަރުވާ ހޯދަމުންދާ ފަރާތްތަކަށް ހާއްސަ ހައްޖު ޖާގައަށް އެދި ހުށަހެޅުމުގެ ފުރުސަތު ހައްޖު ކޯޕަރޭޝަނުން އަލުން ހުޅުވާލައިފި އެވެ. 

ހައްޖު ކޯޕަރޭޝަނުން އިއްޔެ ކުރި އިޢުލާނެއްގައި ބުނީ ޚާއްސަ ޙައްޖު ޖާގައަށް އެދި ހުށަހެޅުމުގެ ފުރުޞަތު އަލުން ހުޅުވާލެވިފައިވަނީ 1445 ވަނަ އަހަރު ރާއްޖޭން މީހުން ހައްޖަށް ގެންދަން ލިބޭ ރަސްމީ ހުރިހާ ޙައްޖު ކޯޓާއެއް، އެ ކޯޕަރޭޝަނަށް ދީފައިވާތީ ކަމަށެވެ. 

އެހެންކަމުން ޚާއްސަ ބަލިތަކަށް ފަރުވާ ހޯދާ މީހުންނަށް އެ ކޯޓާގެ ފަސް ޕަސެންޓް ދޭން ހަމަ ޖައްސާފައިވާ ކަމަށާ, އެ ކުންފުނި މެދުވެރިކޮށް ހައްޖަށް ދާން ފައިސާ ދައްކާ، 09 ނޮވެމްބަރ 2023 ވަނަ ދުވަހުގެ ނިޔަލަށް އެ ކުންފުނީގެ ޙައްޖު ޖާގަ ލިސްޓްގައި ހިމެނިފައިވާ ފަރާތްތަކުގެ ތެރޭން ފުރާނައަށް ނުރައްކާވާފަދަ ބޮޑެތި ބަލިތައް ތަހައްމަލު ކުރާ، ފަރުޟު ހައްޖު އަދާ ކޮށްފައިނުވާ ފަރާތްތަކުން އެ ފުރުސަތަށް އެދުމަށް މިހާރު ހުޅުވާލެވިފައިވާ ކަމަށް އެ ކޯޕަރޭޝަނުން ބުނެފައިވެއެވެ.

ޖާގަ ހަމަޖައްސައިދިނުމަށް އެދިލައްވާ ފަރާތްތަކުން ހުށަހަޅަންޖެހޭ ލިޔުންތައް:

1- ބޮޑެތި ބަލިތައް ތަޙައްމަލު ކުރަމުންދާ ފަރާތްތަކަށް ޚާއްސަ ޖާގައަށް އެދޭ ފޯމް http://mhcl.mv/downloads.html

2- ހެލްތް ސަރޓިފިކޭޝަން ފޯމް

3- ދިވެހި ރައްޔިތެއްކަން އަންގައިދޭ ކާޑުގެ ސާފު ކޮޕީއެއް

ހުށަހެޅުންތައް ބަލައިގަނެވޭނެ އެންމެ ފަހު ތާރީޚަކީ 31 ޑިސެމްބަރ 2023 ވާ އާދިއްތަ ދުވަހުގެ 14:00 ކަމަށް ހައްޖި ކޯޕަރޭޝަނުން ބުނެއެވެ.