ރާއްޖެއިން ބޭރުގައި ކިޔަވާ ދަރިވަރުންނަށް ޑެބިޓް އަދި ކްރެޑިޓް ކާޑު ބޭނުންކޮށްގެން ޑޮލަރު ނެގޭ ލިމިޓް އިތުރުކޮށްފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަހަކަދައްކަވަމުން ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ ޢަބްދުالله ނާޡިމް އިބްރާހީމް ވަނީ މިކަން އިއުލާން ކުރައްވާފައެވެ. 

އެގޮތުން ނާޒިމް ވިދާޅުވީ, މި ނިންމުން ނިންމާފައިވަނީ، އިއްޔެ ބޭއްވުނު ވަޒީރުންގެ މަޖިލީހުގެ ބައްދަލުވުމުގައި މާލީ ވަޒީރު ހުށަހެޅުއްވި ހުށަހެޅުއްވުމާއިއެކު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ކަމަށެވެ. 

Advertisement

މިކަމުގެ ތަފްސީލް ހާމަ ކުރައްވަމުން ނާޒިމް ވިދާޅުވީ، މި ނިންމުން ތަންފީޒުކުރަން ފެށުމަށް ހަމަޖެހިފައިވަނީ އަންނަ ފެބުރުއަރީމަހުގެ 1 ވަނަ ދުވަހުން ފެށިގެން ކަމަށެވެ.

އަދި ތަންފީޒު ކުރަން ފެށުމާއި އެކު، ބީއެމްއެލްގެ ޑެބިޑް އަދި ކްރެޑިޓް ކާޑުގެ ޑޮލަރު ނެގޭ ލިމިޓް، 750 ޑޮލަރުން 1200އާ ހަމައަށް އިތުރު ވެގެންދާނެ ކަމަށް އޭނާ ވިދާޅުވި އެވެ.

ނާޒިމް އިތުރަށް ވިދާޅުވީ، ޑޮލަރު ލިމިޓް އިތުރު ކުރުމަށް ނިންމެވި ނިންމުން ތަންފީޒްކުރުމަށް ކަމާއި ގުޅުންހުރި މުއައްސަސާތަކުން ކުރަންޖެހޭ ހުރިހާ މަސައްކަތްތަކެއް ކުރައްވަމުން ގެންދަވާނެ ކަމަށެވެ. 

ބީއެމްއެލް ކާޑުން ނެގޭ ޑޮލަރު ލިމިޓް އުވާލުމަކީ ރައީސް މުޢިއްޒުގެ ރިޔާސީ ވަޢުދެކެވެ.

ދާދިފަހުން ތުރުކިޔޭ ގައި ދިރިއުޅޭ ދިވެހިންނާއިއެކު ރައީސް ބޭއްވެވި ބައްދަލުވުމުގައިވެސް ބައިވެރިވި ދިވެހިން ވަނީ ކާޑު ލިމިޓްގެ ސަބަބުން ދިމާވާ ދަތިތައް ރައީސްއާ ހިއްސާކުރައްވައި އެ މައްސަލަ ހައްލުކޮށްދިނުމަށް އެދިފައެވެ.

އެއާގުޅިގެން ރައީސް މުޢިއްޒު ވިދާޅުވީ ބީއެމްއެލް އިން މިހާރު ކަނޑައަޅާފައިވާ މިންގަނޑަށް ހައްލެއް ހޯދަން މަސައްކަތް ކުރައްވަމުން އަންނަ ކަމަށެވެ.

ރައީސް މުޢިއްޒުގެ ރިޔާސީ ކެމްޕޭނު ތެރޭގައި ވިދާޅުވީ އެ މަނިކުފާނުގެ ވެރިކަމެއްގައި ކާޑު ލިމިޓު އުވާލުމުގެ މަސައްކަތް ކުރާނީ މަރުހަލާ ތަކެއްގެ ތެރެއިން ކަމަށާއި ފުރަތަމަ ތިން މަހު ލިމިޓް ބޮޑުކުރުމަށްފަހު، ދެން އެއްކޮށް ލިމިޓް އުވާލާނީ ކަމަށް އޭރު ވިދާޅުވި އެވެ.