އަންނަ އަހަރުގެ މާޗު މަހުން ފެށިގެން އެއާ އެމްބިއުލާންސްގެ ޚިދުމަތް ތައާރަފުކުރަން ސަރުކާރުން ނިންމައިފިއެވެ.
މިކަމާއި ގުޅޭގޮތުން މަޢުލޫމާތު ދެއްވުމަށް ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުالله ނާޒިމް އިބްރާހީމް ވަނީ އިއްޔެ ބޭއްވި ވަޒީރުންގެ މަޖިލީހުގެ ބައްދަލުވުމުގައި ރައީސް ޑރ. މުހައްމަދު މުއިއްޒު ނިންމެވި މުހިންމު 9 ނިންމެވުމަކާއި ގުޅޭގޮތުން މަޢުލޫމާތު ދެއްވާފައެވެ.
އެގޮތުން، ނިންމެވި އެއް މުހިންމު ނިންމެވުމަކީ ބަލި މީހުން އުފުލުމުގައި ދިމާވާ ދަތިތައް ހައްލު ކުރުމަށް މާޗު މަހުގެ އެއްވަނަ ދުވަހުން ފެށިގެން އެއާ އެމްބިއުލާންސްގެ ޚިދުމަތް ތައާރަފުކުރަން ނިންމެވިކަން ނާޒިމް ފާހަގަކުރެއްވި އެވެ.
އެ ޚިދުމަތް ތައާރަފުކުރަން ގައުމީ އެއާލައިނާ ގުޅިގެން ދެ މަތިންދާ ބޯޓެއް ހާއްސަކުރަން ވެސް ވަޒީރުންގެ މަޖިލީހުން ނިންމާފައިވާއިރު، ޚިދުމަތް ފޯރުކޮށްދޭނީ ސިއްހީ ކަންކަމާ ބެހޭ ވުޒާރާގައި މިހާރު ވެސް އެމްބިއުލާންސްގެ ޚިދުމަތަށް ހާއްސަކޮށްފައިވާ ޑިޕާޓްމަންޓުން ކަމަށް ނާޒިމް ވިދާޅުވި އެވެ.
ދެ އާއެ އެމްބިއުލާންސް އެއް އިތުރުކޮށް، އެއާ މޯލްޑިވްސް އާއި ގުޅިގެން މި ޚިދުމަތް، މާޗް އެއްވަނަ ދުވަހުން ފެށިގެން ދިވެހި ރައްޔިތުންނަށް ލިބޭނެ އިންތިޒާމް ދިވެހި ރައްޔިތުންނަށް ލިބޭ ގޮތަށް، އެއާ މޯލްޑިވްސް އާ ގުޅިގެން، ކުރިއަށް ގެންދިޔުމަށް. މި މަސައްކަތް ކުރިއަށް ގެންދާނީ، އެމްބިއުލާންސް ގެ ޚިދުމަތް ކުރިއަށް ގެންދިޔުމަށް ކަނޑައެޅިފައިވާ ޑިޕާޓްމަންޓް ގެ ދަށުން.
ޢަބްދުالله ނާޒިމް އިބްރާހީމް
ނާޒިމް އިތުރަށް ވިދާޅުވީ ދެ އެއާ އެމްބިއުލާންސްގެ ޚިދުމަތް ފެށި ނަމަވެސް ޚިދުމަތް ފުޅާވަމުންދާ މިންވަރަކުން ބޯޓުތައް އިތުރުކުރާނެ ކަމަށެވެ.
އެއާ އެމްބިއުލާންސްގެ ޚިދުމަތް ތައާރަފުކުރުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. އަދި، ސަރުކާރުގެ ހަފުތާ 14 މަގުޗާޓުގައި ހިމަނުއްވާފައިވާ މުހިއްމު މަސައްކަތެކެވެ.
Advertisement
This content is created and paid for by advertisers and does not involve Voice Journalists
