ދިގުލައިފައިވާ ސަރުކާރުގެ ކެބިނެޓްގެ ވަޒީރުންނަށް ރައްޔިތުންގެ މަޖިލިހުން ރުހުން ދިނުމުގެ މައްސަލައިގައި ކެބިނެޓްގެ ހުރިހާ ވަޒީރުނަށް ރުހުން ދިނުމަށް ރައްޔިތުންގެ މަޖިލީހުގެ ސަރުކާރު މަސްއޫލިއްޔަތު އަދާ ކުރާ މިންވަރު ބަލާ ކޮމެޓީން މިއަދު ފާސްކޮށްފިއެވެ.
މަޖިލިހުގެ މި ދައުރު ނިންމައި މަޖިލިސް ޗުއްޓީއަށް ގޮސްފައިވަނިކޮށް މިއަދު ބޭއްވި ސަރުކާތުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީއަށް ސަރުކާރުގެ ބާވީސް ވަޒީރުންނަށް އެއްކޮށް ރުހުން އޮތް ކަމަށް ކޮމެޓީއިން ފާސްކުރަން ހުށަހެޅުއްވީ އެމްއެންޕީއަށް ނިސްބަތްވާ ތިމަރަފުށީ ދާއިރާގެ މެންބަރު އަބްދުﷲ ރިޔާޒެވެ. އެ ހުށަހެޅުމަށް ތާއީދު ކުރެއްވީ ޑިމޮކްރެޓްސްއަށް ނިސްބަތްވާ ހިތަދޫ މެދު ދާއިރާގެ މެންބަރު އަޙްމަދު ރަޝީދެއެވެ.
މިއަދުގެ ކޮމެޓީގައި ވަޒީރުންނަށް ރުހުން އޮތްތޯ ނުވަތަ ނެތްތޯ ވަކިވަކިން ވޯޓަށް އެހުމަށް ކޮމެޓީގައި ތިއްބަވާ އެމްޑީޕީގެ ބައެއް މެމްބަރުން ވަނީ ވާހަކަ ދައްކަވައިފައެވެ. އެހެންނަމަވެސް އެގޮތަށް ވޯޓަށް އެހުމަށް އެއްވެސް މެމްބަރަކު ކޮމެޓީއަށް ހުށަހަޅުއްވައިފައެއް ނުވެއެވެ.
ދިހަ މެންބަރުން ހާޒިރުވި ކޮމެޓީގައި އެ އިސްލާހަށް ވޯޓަށް އެހުމުން ސަރުކާރަށް ތާއީދު ކުރައްވާ ފަސް މެންބަރުން ވޯޓް ދެއްވީ އެ އިސްލާހު ހުށަހެޅުއްވި ގޮތަށް ފާސްކުރުމަށެވެ. އަދި އެގޮތަށް ފާސް ކުރަން ނުފެންނަ ކަމަށް ފެންނަ މެންބަރުން ވޯޓް ދިނުމަށް ކޮމެޓީގެ މުގައްރިރު ހުށަހެޅުއްވުމުން ކޮމެޓީގައި ތިއްބަވާ އެމްޑީޕީގެ މެންބަރުން ނިންމީ އެއްވެސް ކޮޅަކަށް ވޯޓް ނުދިނުމަށެވެ.
ވުމާއެކު 22 މެންބަރުންނަށް ރުހުން ދޭން ކޮމެޓީއިން ފާސްވެއްޖެ ކަމުގައި ކޮމެޓީގެ މުގައްރިރު ވަނީ އިއުލާންކުރައްވައިފައެވެ.
Advertisement
This content is created and paid for by advertisers and does not involve Voice Journalists
