އިންޑިއާ ގެ ބޮޑު ވަޒީރު ނަރެންދްރަ މޯދީ އަށް ސަރުކާރުގެ ޑެޕިއުޓީ މިނިސްޓަރުންތަކެއް މަލާމަތް ކުރި މައްސަލާގައި ރަސްމީކޮށް އަދިވެސް އިންޑިއާގެ ކިބައިން މައާފަށް ނޭދޭތީ ފޮރިން މިނިސްޓަރު މޫސާ ޒަމީރު މަޖިލީހަށް ހާޒިރުކުރަން ނިންމައިފިއެވެ.

މި މައްސަލައިގައި ޒަމީރު މަޖިލީހަށް ހާޒިރުކުރަން ހުށަހެޅުއްވީ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް އެވެ.

މީކާއިލް ގެ ފަރާތުން ހުށައެޅި ސުވާލުކުރުމުގެ ނޯޓިސްގައި ވަނީ ސަރުކާރުގެ ޑެޕިއުޓީ މިނިސްޓަރުންތަކެއް މޯދީ އަށް ސޯޝަލް މީޑިއާގައި ފުރައްސާރަކޮށް ކުޑައިމީސް ކުރުމުން ވެސް ސަރުކާރުގެ ފަރާތުން ރަސްމީ ސިފައެއްގައި އިންޑިއާގެ ކިބައިން މައާފަށް އެދިފައި ނުވަނީ ކީއްވެތޯ އާއި މިކަމާ ގުޅިގެން އެ ޑެޕިއުޓީ މިނިސްޓަރުން މަގާމުން ވަކިނުކުރަނީ ކީއްވެތޯ އެވެ.

Advertisement

މީގެ އިތުރުންވެސް މީކާއިލް ބުނެފައިވަނީ  މިކަމަކީ ރާއްޖޭގެ އިގްތިޞާދަށް ފޫނުބެއްދޭ ވަރުގެ ގެއްލުންތަކެއް ކުރިމަތިވެ އަސާސީ ބޭނުންތަކަށް އިންޑިއާއަށް ބަރޯސާވާ ދިވެހިންނަށް އުނދަގޫތަކާއި ކުރިމަތިލާން ޖެހިފައިވާ ކަމެއް ކަމަށާއި، ރާއްޖެއާއި އެންމެ އަވަށްޓެރި އިންޑިއާ އާއި މޫނު ކެނޑެން ޖެހިދާނެ ވަރު ކަމެއް ކަމަށެވެ. އެހެންކަމުން، މަޖިލީހުގެ ހާރިޖީ ގުޅުންތަކާބެހޭ ކޮމިޓީއަށް އެ މައްސަލައިގައި ޝާމިލްވާ ޑެޕިއުޓީ މިނިސްޓަރުންނާއި ސަރުކާރުގެ ކަމާބެހޭ އެންމެހާ ފަރާތްތައް ހާޒިރު ކުރުމަށް ވެސް މީކާއިލް ވަނީ ހުށަހަޅާފަ އެވެ. 

އިންޑިއާގެ ބޮޑުވަޒީރު ނަރެންދްރަ މޯދީ ލަކްޝަދީޕަށް ކުރެއްވި ދަތުރުފުޅެއްގައި އެ ސަރަހައްދުގެ ޓޫރިޒަމް ޕްރޮމޯޓްކުރައްވައި އާންމު ކުރެއްވި ވީޑިއޯއަކަށް ރާއްޖޭގެ ތިން ޑެޕިއުޓީ މިނިސްޓަރަކު ފާޑު ވިދާޅުވުމާއި ގުޅިގެން ސޯޝަލް މީޑިއާ ގައި ދެގައުމުގެ ދެމެދުގައި ދަނީ ހޫނު ބަހުގެ ހަމަލާތަކެއް ރައްދު ކުރެވެމުންނެވެ. 

މި މައްސަލައިގައި ސަރުކާރުން އިއްޔެ ވަނީ ޔޫތު މިނިސްޓްރީގެ ޑެޕިއުޓީ މިނިސްޓަރުން ކަމަށްވާ މަލްޝާ ޝަރީފާއި މަރިޔަމް ޝިއުނާ އަދި މަހުޒޫމް މާޖިދު ސަސްޕެންޑްކޮށްފަ އެވެ. އަދި ސަރުކާރުން ވަނީ މިކަމާއި ގުޅޭގޮތުން ބަޔާނެއް ނެރެ މިކަން ހަރުކަށި އިބާރާތުން ކުށްވެރި ވެސް ކޮށްފައެވެ.

މި މައްސަލަ ހޫނުވެ ފަތުރުވެރިން އެންމެ ގިނައިން އަންނަ އެއް ގައުމު ކަމުގައިވާ އިންޑިއާއިން ދަނީ ރާއްޖޭގެ ފަތުރުވެރިކަން ބޮއިކޮޓް ކުރުމަށް ގޮވާލަމުންނެވެ.