ޔުނިޓީ އިވެންޓްސް އެންޑް އެންޓަޓެއިންމެންޓުގެ "ރަމަޒާން ނައިޓް މާކެޓް 2024" އަންނަ މަހު ބާއްވަން ނިންމައި, މާކެޓްގައި ސްޓޯލް ހުޅުވަން ބޭނުންވާ ފަރާތްތަކަށް އެ ފުރުސަތު ހުޅުވާލައިފިއެވެ. 

ފީނިކްސް ކޯ އާ ގުޅިގެން ޔުނިޓީ ގުޅިގެން ބާއްވާ މި ނައިޓް މާކެޓް އޮންނާނީ މަހުގެ އެއް ވަނަ ދުވަހުން ފެށެގެން 15 ވަނަ ދުވަހަށް ހުޅުމާލެ ދެވަނަ ފިޔަވަހީގެ ކްރިކެޓް ސްޓޭޑިއަމްގައެވެ.  އަދި ނައިޓް މާކޭޓް އޮންނާނީ، މާކެޓް ބޭއްވުމަށް ހަމަޖެހިފައިވާ ކޮންމެ ދުވަހެއްގެ ހަވީރު 4:00 އިން ރޭގަނޑު 12:00 އަށް ކަމަށް ޔުނިޓީން ބުނެފައިވެއެވެ.

މި ނައިޓް މާކެޓްގައި 180 ސްޓޯލް ބަހެއްޓުމަށް ނިންމާފައިވާއިރު ނައިޓް މާކެޓްގައި ބައިވެރިވާން ބޭނުންވާ ވިޔަފާރިތަކުން 9141432 ގުޅައިގެން މިހާރުވެސް ސްޓޯލް ބުކް ކުރެވޭނެ ކަމަށްވެސް ޔުނިޓީން ބުނެފައިވެއެވެ. އަދި މިހާރުވެސް މާކެޓްގައި ބަހަށްޓަން 100 އަށްވުރެ ގިނަ ސްޓޯލް ވިކިފައިވާ ކަމަށް މައުލޫމާތު ދެއެވެ. 

ޔުނިޓީން އިތުރަށް ބުނީ، ރޯދަ މަހަށް ހާއްސަ ކޮށްގެން ބާއްވާ މި ނައިޓް މާކެޓް އޮންނަ ކޮންމެ ރެޔަކު ކަސްޓަމަރުންނަށް އެކި އިނާމުތައް ލިބިގެންދާނެ ކަމަށާ މިފަހަރު ގޭމް ކުޅޭނެ ހާއްސަ ސަރަހައްދެއް ވެސް އޮންނާނެ ކަމަށެވެ.

އަދި ކާބޯތަކެއްޗަށް ހާއްސަ ސަރަހައްދަކާއި އެޑްވަޓައިޒް ކުރުމުގެ ތަފާތު ފުރުސަތުތައް ވެސް ހުޅުވާލާފައިވާ ކަމަށް ބުނެފައިވެއެވެ.

"ސޯޝަލް މީޑިއާ ޕްރޮމޯޝަނެއް ވެސް އޮންނާނެ. އެކަން އިއުލާނު ކުރާނީ ނައިޓް މާކެޓް ފަށާ ދުވަހު. ނައިޓް މާކެޓްގެ އެންމެ ފަހު ދުވަހާ ޖެހެންދެން މި ޕްރޮމޯޝަން ކުރިއަށް ދާނެ،" ޔުނިޓީން މައުލޫމާތު ދެއެވެ.

ޔުނިޓީ އިން ބުނާ ގޮތުގައި މި ނައިޓް މާކެޓަށް 80،000 އާއި ލައްކައަކާ ދެމެދުގެ އަދަދަކަށް މީހުން އަންނާނެ ކަމަށް ލަފާ ކުރެވެ އެވެ. ޔުނިޓީ އިން މީގެ ކުރިން ވެސް ވަނީ ވަރަށް ކާމިޔާބު ނައިޓް މާކެޓްތައް އިންތިޒާމްކޮށް ކުރިއަށް ގެންގޮސްފަ އެވެ.