މިއަހަރު ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލިހުގެ އިންތިހާބު ބޭއްވުމަށް ހަމަޖެހިފައިވަނީ އާދިއްތަ ދުވަހެއް ކަމުގައި ވިޔަސް އެދުވަސް ސަރުކާރު ބަންދުވާނެ ކަމަށް އިލެކްޝަންސް ކޮމިޝަން އީސީން ވިދާޅުވެއްޖެއެވެ.

އެކަން ހާމަކުރައްވާފައި ވަނީ މަޖިލިސް އިންތިޚާބުގެ ޤައުމީ ލަފާދޭ ކޮމިޓީގެ ބައްދަލުވުމުގައި ވާހަކަފުޅު ދައްކަވަމުން އެ ކޮމިޝަނުގެ ނައިބު ރައީސް އިސްމާއިލް ހަބީބެވެ.

މިއަހަރުގެ މަޖިލިސް އިންތިޚާބު ބާއްވަން އިލެކްޝަސް ކޮމިޝަނުން ނިންމާފައިވާ މާރޗުމަހުގެ 17 ވަނަ ދުވަހަކީ އާދީއްތަ ދުވަހަކަށްވުމުން ޤައުމީ ލަފާ ދޭ ކޮމިޓީން ވަނީ ކަންބޮޑުވުން ފާޅުކުރައްވާފައެވެ. އެކަމާއި ގުޅިގެން ހަބީބު ވިދާޅުވީ މަޖިލިސް އިންތިޚާބު ބާއްވާ ދުވަސް ބަންދު ދުވަހެއްގެ ގޮތުގައި ކަނޑައެޅުމަށް ސަރުކާރަށް މިހާރު ހުށަހަޅުއްވާފައިވާ ކަމަށާއި އެ ދުވަސް ބަންދުވާނެ ކަމަށެވެ.

Advertisement

ހަބީބު ވިދާޅުވީ އާދިއްތަ ދުވަހު އިންތިހާބު ބޭއްވުމަކީ މަޖިލިހުން އަލަށް ކުރައްވާކަމެއް ނޫންކަމަށާއި 2018 ވަނަ އހަރުގެ ރިޔާސީ އިންތިހާބުވެސް ބާއްވާފައިވަނީ އާދިއްތަ ދުވަހެއްގައި ކަމަށެވެ. އަދި ކޮންމެ ސަރުކާރެއް އޮތް ކަމުގައިވި ނަމަވެސް އިންތިޚާބު ބާއްވާ ދުވަސް ބަންދުކޮށްދޭން އެދުމުން އެކަން އެގޮތަށް ކޮށްދޭ ކަމަށް އޭނާ ވިދާޅުވިއެވެ.

މަޖިލިސް އިންތިޚާބުގެ ޤައުމީ ލަފާދޭ ކޮމިޓީގެ މިއަދު ބޭއްވުނު ބައްދަލުވުމުގައި ވަނީ މަޖިލިސް އިންތިޚާބު ބާއްވާ ތާރީހު ރަމަޟާން މަހާ ދިމާވާތީ އިންތިޚާބު ކުރިއަށްދާނެ ވަގުތާ ގުޅޭގޮތުން ވެސް މަޝްވަރާ ކުރައްވާފައެވެ. އެގޮތުން ބައްދަލުވުމުގައި ބައިވެރިވި ހުރިހާ ސިޔާސީ ޕާޓީތަކުންނާއި ގިނަ މުއައްސަސާތަކުން ވެސް އީސީ އަށް ލަފާ ދެއްވީ ވީހާވެސް ގިނަ ވަގުތު ވޯޓުލުމަށް ދިނުމުގެ ގޮތުންނާއި ރައްޔިތުންނަށް ފަސޭހަވާނެހެން ހެނދުނު 9:00 އިން ހަވީރު 5:00 އާ ހަމައަށް ވޯޓުލުމުގެ ވަގުތު ކަނޑައެޅުއްވުމަށެވެ.

މިއަދުގެ ބައްދަލުވުމުގައި ސިޔާސީ ޕާޓީތަކާއި މުއައްސަސާތަކުން ވަނީ އީސީން ކަނޑައަޅާ ވަގުތަށް ބަދަލު ނުގެނައުމަށް ވެސް ލަފާ އަރުއްވާފައެވެ. އަދި ވަގުތަށް އެއްވެސް ބަދަލެއް ގެންނަ ނަމަ އެކަން އެ ކޮމިޓީއާ މަޝްވަރާ ކުރުމަށާއި ސަބަބު ސާފުކޮށް އެންގުމަށްވެސް ލަފާދެއްވިއެވެ. އީސީން ވެސް ވަނީ މިހާރު އެ ކޮމިޝަނުން ކަނޑައަޅާފައިވާ ތާރީޚުތަކާއި ވަގުތުތަކަށް ބަދަލު ނުގެންނާނެ ކަމަށް ވިދާޅުވެފައެވެ.