ޗައިނާގެ ރީސާޗު ބޯޓެއް އިންޑިޔާ ކަނޑު ހުރަސްކޮށް، ދިވެހިރާއްޖެއަށް ދަތުރުކުރަމުންދާތީ، އިންޑިޔާއިން ކަންބޮޑުވުން ފާޅުކޮށްފި އެވެ.

އިންޑިޔާގެ މިލިޓަރީގައި މަސައްކަތް ކުރަމުންދާ، މީހަކާއި ހަވާލާދީ ރޮއިޓާސް އިން ބުނެފައިވާ ގޮތުގައި, ރާއްޖެއަށް ދަތުރު ކުރަމުންދަނީ ޗައިނާގެ "ޝިއާން ޔޭންގ ހޮންގ 03" ނަމަކަމަށް ކިޔާ ރިސާޗް ބޯޓެކެވެ. 

އަދި އެ ބޯޓުގެ މިސްރާބު ހުރީ، ރާއްޖޭގެ ވެރިރަށްް މާލެއަށް ކަމަށާ، އެ ބޯޓުން އިންޑިޔާގެ ކަނޑުގެ ސާވޭއެއް ހެދުމަށް ހަމަޖެހިފައިވާ ކަމަށްވެސް ބުނެފައިވެއެވެ. އެހެންކަމުން އެ ބޯޓުގެ ހުރިހާ ހަރަކާތެއް ވަރަށް ގާތުން ބަލަމުން އަންނަ ކަމަށްވެސް އެ އޮފިޝަލް ބުނެފައިވެއެވެ. 

މީގެ އިތުރުން ރޮއިޓާސް އިން ބުނެފައިވާ ގޮތުގައި، ޗައިނާގެ އެ ބޯޓަކީ މިލިޓަރީ ބޯޓެއް ނޫނެވެ. އެހެން ނަމަވެސް، އިންޑިޔާއިން ކަންބޮޑުވަނީ، އެ ބޯޓުން ހަދާ ދިރާސާތައް ޗައިނާގެ މިލިޓަރީން ބޭނުންކޮށްފާނެތީއެވެ.  

މީގެ އިތުރުން އިންޑިއާގެ ނޫސްތަކުން ބުނާގޮތުން، މި އުޅަނދުގައި ސަވޭލެންސް މަސައްކަތްތައް ކުރުމަށް ބޭނުންވާ އެންމެ ފަހުގެ ވަސީލަތްތައް ހަރުކުރެވިފައިވެއެވެ. އަދި މި އުޅަނދު ރާއްޖެއާއި ހިސާބަށް ފޯރާނެކަމަށް ބެލެވެނީ ފެބްރުއަރީ މަހުގެ ފުރަތަމަ ހަފްތާގެ ތެރޭގައިކަމަށެވެ.

މީގެ ކުރިންވެސް ޗައިނާގެ މިފަދަ އުޅަނދުތައް އިންޑިޔާ ކަނޑުގައި ހަރަކާތްތެރިވުމާއި އިންޑިޔާއިން ދެކޮޅު ހަދާފައިވެއެވެ. އަދި، އެފަދަ އުޅަނދުތައް އިންޑިޔާއާއި ގާތްގުޅުމެއް އޮންނަ، ސްރީލަންކާގައި ބަނދަރުކުރުންވެސް 2022 ވަނަ އަހަރު ތެރޭގައި އިންޑިޔާގެ ނުފޫޒާއެކު ސްރީލަންކާ އިން މަނާ ކޮށްފައި ވެއެވެ. 

އިންޑިޔާއިން ތުހުމަތު ކުރާ ގޮތުގައި ޗައިނާގެ އެފަދަ އުޅަނދުތަކަކީ އެ ގައުމަށް ޖާސޫސްކުރުމަށް ބޭނުންކުރަމުންދާކަމަށް އުޅަނދު ތަކެކެވެ.